Манай улсын ноос ноолуур, арьс ширний нийлүүлэлтийн сүлжээн дэх химийн хорт, аюултай бодисын хэрэглээг багасгах төслийг хэрэгжүүлнэ.

Улаанбаатар хот, Дархан, Эрдэнэт, Хөвсгөл, Өвөрхангай аймагт төслийг хэрэгжүүлэхдээ нийлүүлэлтийн сүлжээн дэх аюултай химийн бодисын хэрэглээг багасгаж, тойрог эдийн засагт суурилсан тогтвортой үйлдвэрлэлийг дэмжих юм. Ингэснээр байгаль орчин, хүний эрүүл мэндэд үзүүлэх сөрөг нөлөөллийг багасгах ач холбогдолтойг БОУАӨЯ-ны Химийн бодисын бодлого, төлөвлөлт хариуцсан шинжээч Л.Батзориг химийн бодисын талаар баримталж байгаа бодлого, хэрэгжилт талаар мэдээлэл өгөх үеэрээ тэмдэглэв.

Мөн ноос, ноолуур, арьс ширний салбараас үүсэж буй хаягдлыг багасгах, дахин ашиглах шийдлийг нэвтрүүлэхээс гадна химийн хорт, аюултай бодисын тооллогыг энэ онд хийж, амьдралын мөчлөгийн үнэлгээг эхлүүлэх юм. Төслийн үр дүнд 573,875 тонн нүүрстөрөгчийн давхар исэлтэй тэнцэх хэмжээний хүлэмжийн хийн ялгарал болон удаан задардаг органик бохирдуулагч бодисын хэрэглээг багасгахыг зорьж байна.

Энэ төсөл нь Монгол Улсын нэгдэн орсон Стокгольмын конвенцын хэрэгжилтийг хангахад чухал дэмжлэг болох бөгөөд суурь судалгаа, нөлөөлөл, чадавхжуулах сургалтыг үе шаттай хэрэгжүүлэхээр төлөвлөжээ.

Даян дэлхийн байгаль орчны сангийн санхүүжилтээр НҮБ-ын Хөгжлийн хөтөлбөр, БОУАӨЯ, ХХААХҮЯ хамтран хэрэгжүүлэх төсөл нь олон улсын байгаль орчны хөтөлбөрийн нэг хэсэг юм. Төслийг найман улсад 72 сарын хугацаанд хэрэгжүүлэх ажээ.