Монгол Улсаас ЮНЕСКО-гийн дэргэд суугаа Байнгын төлөөлөгчийн газар, БОУАӨЯ, ЮНЕСКО хамтран “НҮБ-ын Цөлжилттэй тэмцэх тухай конвенц (UNCCD)-ын Талуудын 17 дугаар бага хуралд (COP17) ЮНЕСКО-гийн оролцоо” мэдээллийн уулзалтыг Парис хотноо зохион байгууллаа.

Уулзалтыг ЮНЕСКО-гийн Байгалийн шинжлэх ухааны салбарын Ерөнхий захирлын орлогч хатагтай Лидия Брито нээж, COP17-ын хүрээнд ЮНЕСКО-гийн гүйцэтгэх үүрэг, тэргүүлэх чиглэлийг танилцуулсныг Парис дахь Монгол Улсын Элчин сайдын яамнаас мэдээлэв.

БОУАӨ-ийн дэд сайд Б.Мөнхтамир, тус яамны Гадаад хамтын ажиллагааны газрын дарга Д.Ариунтуяа нар оролцож, Монгол Улс COP17 бага хурлыг зохион байгуулах бэлтгэл болон дэвшүүлж буй санаачилгыг танилцуулсан байна.

Тус уулзалтаар Монгол Улсаас дэвшүүлж буй “Тал нутгийн үйл ажиллагааны хөтөлбөр”, “Бэлчээрийн тогтвортой менежментийн санаачилга”, “Ус-Газрын нэгдсэн менежментийн санаачилга”, “Байгальд суурилсан шийдлүүдэд тулгуурласан тогтвортой дэд бүтцийн санаачилга” зэрэг нь уур амьсгалын өөрчлөлт, цөлжилт, газрын доройтол, усны хомсдол зэрэг дэлхийн тулгамдсан асуудлыг шийдэх цогц, хамтын ажиллагаанд суурилсан механизм болохыг онцолжээ.

Түүнчлэн эдгээр санаачилга нь Монгол Улсын төдийгүй дэлхийн улс орон, иргэдийн нийтлэг ашиг сонирхолд нийцсэн, байгаль орчны тогтвортой байдал, хүнсний аюулгүй байдал, эдийн засгийн тогтвортой өсөлтийг дэмжих ач холбогдолтойг тэмдэглэлээ.

Уулзалтад ЮНЕСКО-гийн гишүүн орнуудын Байнгын төлөөлөгч, олон улсын байгууллагын төлөөлөл өргөнөөр оролцож, санал бодлоо солилцон асуулт хариултын хэлэлцүүлэг өрнүүлэв. Монгол Улсаас ЮНЕСКО-гийн дэргэд суугаа Элчин сайд, Байнгын төлөөлөгч У.Нямхүү хаалтын үг хэлэхдээ COP17 бага хуралд улс орнууд өндөр түвшний оролцоогоо хангах ач холбогдлыг тэмдэглэж, гишүүн орнуудын дэвшүүлж буй санаачилгыг дэмжин хамтран ажиллахыг уриалжээ.

Монгол Улс НҮБ-ын Цөлжилттэй тэмцэх тухай конвенцын Талуудын 17 дугаар бага хурлыг Улаанбаатар хотноо энэ оны 8 дугаар сарын 17-28-нд зохион байгуулж, газар, ус, уур амьсгалын асуудлаарх дэлхийн хамтын ажиллагааг шинэ шатанд гаргахад хувь нэмрээ оруулах юм.