Ирэх сарын 2-нд Алтайн салбар уулс болон говийн нутгаар секундэд 12-14 метр, зарим үед 16-18 метр хүрч шороон шуурга шуурахыг аймгийн Ус цаг уур, орчны шинжилгээний газраас мэдээлэв.
Шуургатай өдөр иргэд цаг агаарын мэдээ, мэдээллийг цаг тухай бүр хүлээн авах, мэргэжлийн байгууллагаас өгч байгаа сэрэмжлүүлэг, анхааруулгыг дагах, онцын шаардлагагүй бол хол, ойрын замд гарахгүй байхыг аймгийн Онцгой байдлын газраас зөвлөлөө. Мөн шаардлагатай тохиолдолд замд гарахдаа тээврийн хэрэгслийн найдвартай байдлыг хангаж бензин, шатахууны нөөцтэй, дулаан хувцастай зорчих, баталгаагүй зам, гүүр, гарамгүй газраар зорчихгүй байх, иргэд, малчид салхи шуурганд төөрөх, малтайгаа уруудах эрсдэлээс урьдчилан сэргийлж, малаа ойрын бэлчээрт хариулах, бага насны хүүхдийг малд явуулахгүй байхыг тус газраас анхааруулж байна.
Энэ сарын 31, ирэх 2-нд уулархаг нутгийн зарим газраар ялимгуй хур тунадас орно.
Энэ долоо хоногийг дуусталх хугацаанд агаарын температур: Хангайн уулархаг нутгаар шөнөдөө -10 -15 градус хүйтэн, өдөртөө +3 +8 градус дулаан байна.
Харин Алтайн салбар уулс, тал хээр, говийн нутгаар шөнөдөө -3 -8 градус хүйтэн, өдөртөө +9 +14 градус дулаан, Эхийнголын Баянбүрд орчмоор шөнөдөө +2 +7 градус, өдөртөө +16 +21 градус дулаан байх төлөвтэй.
