Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд Батлан хамгаалах яам, ”Эрдэнэс Тавантолгой” хувьцаат компани хамтран “Сая тонн-Сая мод” хөтөлбөрийг Дорноговь аймагт хэрэгжүүлэхээр "Зүүнбаян" агропаркийн үйл ажиллагааг эхлүүлсэн билээ.

Монгол орны говь болон говь хээрийн бүсэд цөлжилтийг бууруулах, хуурайшилтыг багасгах, агро ойн аж ахуйг бэхжүүлж, ногоон эдийн засгийг хөгжүүлэх зорилготой тус хөтөлбөрийг Зэвсэгт хүчний 336 дугаар ангийнхан хариуцаж, өнөөдөр Монгол Улсын жишиг агропарк болгон хөгжүүлээд байна.

Тэгвэл гуравдугаар сарын 29-ний энэ өдөр Зэвсэгт хүчний Хуурай замын цэргийн командлагч хошууч генерал Ч.Цогтжаргал, "Эрдэнэс Тавантолгой" ХК-ийн Захиргаа удирдлагын газрын зөвлөх Ж.Сауле, Уул уурхай, технологийн газрын дарга Ч.Алтанбагана нарын албаныхан “Зүүнбаян" агропаркийн үйл ажиллагаатай танилцсан юм.

Албаныханд Зэвсэгт хүчний 336 дугаар ангийн Мод үржүүлэг, агро-экологийн төвийн дарга, ойн инженер, хошууч К.Хайрат говь хээрийн бүсэд ургах чадвар бүхий мод, сөөгийн үр, мөчрөөр тарьц суулгацын нөөц бүрдүүлж, хээрийн ойжуулалт, хамгаалалтын зурвас байгуулахад бэлэн болсныг онцлов.Мөн тэрээр Монголд анх удаа өвлийн хүлэмжид заг модны үрсэлгээг амжилттай тарьж ургуулсныг илтгэж, 150 га бүхий загийн ойжуулалтын явц байдлыг газар дээр нь танилцууллаа.

Энэ үеэр Хуурай замын цэргийн командлагч хошууч генерал Ч.Цогтжаргал Зэвсэгт хүчний 336 дугаар ангийн Мод үржүүлэг, агро-экологийн төвийг түшиглэсэн “Сая тонн-Сая мод” хөтөлбөр эхэлсэн цагаасаа хойш үр дүнтэй хэрэгжиж буйг тодотгоод модны суулгац бэлтгэх ажилтай зэрэгцүүлэн бүтээн байгуулалтыг давхар гүйцэтгэж байгаа тус ангийн алба хаагчдад талархал дэвшүүллээ.