БОУАӨЯ, Дэ Нэйче Консерванси, Монголын Байгалийн өв сан хамтран 500 саяас 3 хүртэл тэрбум төгрөгийн грант олгох “Тусгай хамгаалалттай газар нутгийн хурдасгуур” хөтөлбөрийн сонгон шалгаруулалтыг зарлалаа.

ТХГН-ийн хамгаалалтын 11 захиргааг сонгон шалгаруулж, эхний ээлжинд 6-8 сар бэлэн байдлын хөтөлбөрт хамруулна. Санхүүжилт олгохоос өмнө менежментийн буюу тухайн ТХГН-т байгаль хамгаалал, аялал жуулчлал, газар зохион байгуулалтын төлөвлөгөө боловсруулах юм. Үүний дараа төлөвлөгөөгөө хэрэгжүүлэх, менежментээ сайжруулах грант хүсэх боломжтойг Монголын Байгалийн өв сангийн гүйцэтгэх захирал Э.Номиндарь онцлов.

Тэрбээр, ТХГН-ийн байгаль хамгааллын менежментийн зөв жишиг загвар бий болгохыг зорьж байгааг тодотгоод, байгалийг яаж хамгаалах, тогтвортой санхүүгийн эх үүсвэрийг хэрхэн бүрдүүлдэг, орон нутгийн иргэдтэй яаж хамтарч ажиллах, байгаль хамгааллын судалгаа үр дүн мониторинг яаж хийдгийг харуулсан загвар бий болгохыг хэлж байлаа.

“ТХГН-ийн хурдасгуур” хөтөлбөр 6 шалгууртай. Үүнд, экологийн хувьд тухайн хамгаалж буй газрынх нь үнэ цэн ач холбогдол, менежментийн бэлэн байдал, төлөвлөлөлт, ТХГН-ийн захиргааны засаглал, ажилтны чадавх, оролцоо буюу аймаг орон нутгийн захиргаад орон нутгийн байгууллагатай хэрхэн хамтарч ажилладаг, тогтвортой буюу өөрийгөө санхүүжүүлэх боломж бий юу, орон нутгийн дэмжлэгтэй төсөв хуваарилуулж чадаж байгаа эсэхийг харгалзах юм байна.

Шалгаруулсан ТХГН-ийн хамгаалалтын 11 захиргаанд нийт 13 тэрбум төгрөгийн санхүүжилт хуваарилах ажээ.

"Өнө мөнхийн Монгол" байгаль хамгааллын байнгын санхүүжилтийн хөтөлбөрийн хүрээнд ТХГН-ийн хамгаалалтын захиргаадын менежментийн үр ашигтай байдлыг нэмэх, урт хугацааны тогтвортой санхүүжилт бий болгох, нутгийн иргэдийн оролцоох дэмжих зорилготой тус хөтөлбөрийг 2026-2029 он хүртэл 2 үе шаттай хэрэгжүүлнэ. Ингэхдээ ТХГН-ийн хамгаалалтын 11 захиргааг сонгон шалгаруулах бөгөөд гранттай холбоотой мэдээлэл өгөх уулзалтыг энэ сарын 13-нд цахимаар зохион байгуулж, өргөдлийг 4 дүгээр сарын 5 хүртэл хүлээн авах юм.