Хэдэн арван жилийн турш нэр нь үл мэдэгдэх зураачийнх хэмээн үзэж байсан нэгэн бүтээл Рембрандт Харменс ван Рейнийх болохыг Амстердамын уран зургийн Рейксмюсеум музейн судлаачид тогтоожээ.
“Сүм дэх Захариагийн бараалхал” гэдэг нэртэй уг зургийг чухам хэн зурсан болохыг тогтоохын тулд орчин үеийн сканнерын технологийг ашигласан бөгөөд энэ аргачлалыг өмнө нь Рембрандтын өөр нэг шилдэг бүтээл болох “Шөнийн харуул” зургийг сэргээн засварлахад ашиглаж байв.
1633 онд зотон дээр зурсан уг бүтээлд Библид гардаг нэгэн үзэгдлийг дүрсэлжээ. Тодруулбал, Адислагч Иоанны эцэг болох лам Захариа хүүгээ удахгүй төрөх гэж байгаа тухай мэдээг дуулгасан тэнгэрийн элч Гавриилыг сүмийн дотор байхад нь харж буйг дүрсэлсэн ажээ. Зурган дээр тэнгэр элчийг дүрслээгүй боловч түүний ирснийг баруун дээд буланд харагдах гэрэл илтгэдэг.
Зургийг эзэмшиж байсан нэгэн цуглуулагч уг бүтээлийг музейд удаан хугацаагаар түрээслүүлсэн бөгөөд түүнийг гуравдугаар сарын 4-нөөс үзэх боломжтой.
Энэхүү зургийг 1898 онд Амстердамын Хотын музейд дэлгэсэн Рембрандтын томоохон үзэсгэлэнд толилуулж байсан боловч 1960 онд зураачийн бүтээлүүдийн жагсаалтаас хассан байна. Дараа жил нь хувийн цуглуулагч худалдаж авсан тул урлаг судлаачид 60 жилийн туршид зургийг нарийвчлан судлах боломжгүй байв. Гэвч одоогийн эзэмшигч нь саяхан Рейксмюсеумд хандсанаар нарийвчилсан шинжилгээ хийх боломжтой болжээ.
Эх сурвалж: DW
