“Музейн нээлттэй өдрүүд 2026” үйл ажиллагааг улсын хэмжээнд гуравдугаар сарын 1-7-ийг хүртэл зохион байгуулна.

Энэхүү үйл ажиллагаа нь түүх, соёлын дурсгалт зүйл, урлагийн бүтээлээр дамжуулан хүүхэд, залуучууд болон гэр бүлийн гишүүдэд үндэсний бахархал, эх оронч үзлийг төлөвшүүлэх, гэр бүлийн боловсрол, хамтын оролцоог дэмжих зорилготой юм.

Энэ өдрүүдэд нийслэл хот болон 21 аймагт үйл ажиллагаа явуулдаг төрийн болон орон нутгийн өмчийн бүх музей байнгын үзүүллэгийн танхимаараа иргэд олон нийтэд үнэ төлбөргүй үйлчилнэ.

Түүнчлэн төр, нийгмийн нэрт зүтгэлтэн, Монгол Улсын Ерөнхий сайд А.Амарын мэндэлсний 140, Монгол Улсын Ерөнхий сайд асан Ж.Батмөнхийн мэндэлсний 100, их зохиолч Д.Нацагдоржийн мэндэлсний 120 жилийн ой зэрэг бусад түүхэн хүмүүсийн дурсгалыг мөнхжүүлэх агуулгын хүрээнд олон нийтийн оролцоог хангасан тусгай үзэсгэлэн, боловсролын хөтөлбөр, лекц, уулзалт хэлэлцүүлэг болно.

Мөн гэр бүлийн аялал, хүүхэд, эцэг эхийн хамтарсан танин мэдэхүйн тоглоом, бүтээлч ажил, соёлын өв, уламжлал таниулах, музейн тайлбарлагчтай аялал зэрэг гэр бүлд чиглэсэн боловсрол, оролцооны хөтөлбөр, хүүхэд, залуучууд музейн орчинд зөв зохистой хандах, соёлын өвийг хамгаалах хандлагыг дэмжих, мэдлэг ойлголтыг нэмэгдүүлэх бүтээлч ажлууд, музейн сан хөмрөг дахь түүх, соёлын дурсгалын хадгалалт хамгаалалт, сэргээн засварлалт, судалгааны ажлын ач холбогдол, онцлогийг олон нийтэд таниулахад чиглэсэн олон талт үйл ажиллагааг  зохион байгуулах аж.