Дэлхий даяар сая сая шүтэн бишрэгчидтэй "Hello Kitty" дүрийн загвар зохион бүтээгчээр 1980-аад оноос хойш ажилласан Юко Ямагүчи албан тушаалаа хүлээлгэн өгөх болсноо зарлалаа. "Sanrio" компанийн мэдээлснээр, алдарт дизайнерыг 2026 оны сүүлчээр ажлаа өгөхөд түүний халааг "Aya" гэх нууц нэрээр олонд танигдсан шинэ үеийн дизайнер авна гэж "The Japan Times" сонин уламжлав.

"Hello Kitty" дүрийг анх 1974 оны 11 дүгээр сарын 1-нд Японы дизайнер Юко Шимизү бүтээж байсан түүхтэй. Анх зоосны хэтэвчин дээр дүрслэгдэн гарч ирсэн энэхүү өхөөрдөм муурны дүр төрхийг Юко Ямагүчи 1980 оноос эхлэн үргэлжлүүлэн хөгжүүлж, өнөөдрийн бидний мэдэх дэлхийн хэмжээний брэнд болгоход гол үүргийг гүйцэтгэсэн юм. Өдгөө 71 нас хүрсэн тэрээр өөрийн шийдвэрээ "өртөөлөх уралдааны бамбарыг дараагийн үедээ дамжуулж буй хэрэг" хэмээн тайлбарлажээ.

Түүний удирдлага дор Hello Kitty зөвхөн хүүхдийн тоглоом төдийхөн байхаа больж, Adidas, Balenciaga зэрэг дэлхийн топ брэндүүдтэй хамтран ажилладаг загварын томоохон дүр төрх болж чадсан юм. Цаашид "Sanrio" компани үйл ажиллагаагаа улам өргөжүүлэхээр төлөвлөж байгаа бөгөөд үүний нэг хэсэг нь Warner Bros. Pictures Animation болон New Line Cinema студиудтэй хамтран бүтээж буй бүрэн хэмжээний уран сайхны кино юм. Тус киног 2028 оны 6 дугаар сарын 21-нд нээхээр төлөвлөсөн байна.

Мөн ирэх онд БНХАУ-д Hello Kitty-гийн сэдэвчилсэн шинэ парк үүд хаалгаа нээхээр хүлээгдэж байгаа нь уг дүрийн нэр хүнд шинэ дизайнерын гар дээр улам өсөх ирээдүйтэйг харуулж байна.

Эх сурвалж: Reuters