Германы Ерөнхийлөгч Франк-Вальтер Штайнмайер “Төв Ази-Герман” (C5+1) хэлбэрээр сайд нарын түвшинд хийсэн уулзалтын хүрээнд Төв Азийн орнуудын Гадаад хэргийн сайд нарыг пүрэв гарагт хүлээн авч уулзжээ.
Төв Ази нь тогтвортой бүс нутгийн хувиар, мөн үр өгөөжтэй яриа хэлэлцээ хийх болон олон улсын өмнө хүлээх үүрэг хариуцлага нь өсөн нэмэгдэж буй бүс нутаг болохын хувьд онцгой ач холбогдолтой гэдгийг уулзалтын үеэр онцоллоо гэж Казахстаны Гадаад хэргийн яамны хэвлэлийн алба мэдээлсэн байна.
Ерөнхийлөгч Штайнмайер хэлэхдээ, Герман улсын хувьд Төв Азийн орнуудтай хийж буй харилцаа, хамтын ажиллагааг харилцан хүндэтгэл, итгэлцэл, мөн урт хугацааны хамтын ажиллагааны зарчимд тулгуурлан хөгжүүлэхэд онцгой анхаардаг хэмээн онцолсон байна.
Уулзалтад Казахстаны Гадаад хэргийн сайд Ермек Кошербаев, Киргизийн Гадаад хэргийн сайд Жеенбек Кулубаев, Тажикистаны Гадаад хэргийн сайд Сирожиддин Мухриддин, Узбекистаны Гадаад хэргийн сайд Бахтиёр Саидов, Туркменистаны Гадаад хэргийн сайд Ахмет Гурбанов нар оролцлоо. Туркменистаны Гадаад хэргийн яамны хэвлэлийн албаны мэдээлснээр, Төв Азийн орнууд бол Германы хувьд эрчим хүчний салбар дахь, мөн уур амьсгалын өөрчлөлттэй тэмцэх чиглэл дэх чухал түншүүд гэдгийг уулзалтад оролцогчид онцолсон байна.
Мөн Берлин хотноо Төв Азийн орнуудын болон Германы Гадаад хэргийн сайд нар оролцсон эдийн засгийн чуулга уулзалт болжээ.
Эх сурвалж: Anadolu
