Сэргэн мандалтын үеийн суут зураач Микеланжело Буонарротийн саяхан олдсон нэгэн ховор таталбар зураг Нью-Йорк хотноо болсон Christie’s дуудлага худалдаагаар 27.2 сая ам.доллароор арилжаалагдлаа. Энэ нь тухайн бүтээлийн анхны үнэлгээнээс даруй 20 дахин өндөр үнэ бөгөөд мастерын график бүтээлүүдийн хувьд шинэ дээд амжилт тогтоож байна.

Сикстийн дуганы ханын зургийн нэгээхэн хэсэг

Улаан шохойгоор (sanguine) зурсан уг таталбар зурагт Ватиканы Сикстийн дуганы таазны алдарт ханын зурагт дүрслэгдсэн "Ливийн сивилла" (Libyan Sibyl)-ийн баруун хөлийн тавхайг дүрсэлсэн болохыг Christie’s ордны шинжээчид тогтоожээ.

Италийн домогт зураачийн энэхүү судалбар зураг нь өмнө нь хэзээ ч олон нийтийн хүртээл болж байгаагүй, хувийн цуглуулгад хадгалагдаж байсан гэдгээрээ урлаг сонирхогчдын анхаарлыг ихэд татсан юм.

10 минутын дотор өссөн үнэ

Дуудлага худалдаа эхлэхэд шинжээчид уг таталбарыг 1.5 сая ам.доллар орчим хүрнэ гэж таамаглаж байв. Гэвч арилжаа эхлээд ердөө 10 минут хүрэхгүй хугацааны дараа нэрээ нууцалсан худалдан авагч үнийг огцом өсгөн, ийнхүү 27.2 сая доллароор эзэмшигч нь болжээ.

График бүтээлүүдийн шинэ рекорд

Микеланжелогийн өмнөх дээд амжилтыг 2022 онд Парисын Christie’s ордноор арилжаалагдсан "Нүцгэн залуу" хэмээх хар зураг эзэмшиж байсан бөгөөд тухайн үед 24.3 сая ам.доллароор зарагдаж байв.

Урлагийн ховор бүтээлүүдийн арилжаа эрчимжиж буйн өөр нэг жишээ нь өмнөхөн нь Нью-Йоркийн Sotheby’s дуудлага худалдаагаар Рембрандтын "Тайван байгаа залуу арслан" хэмээх таталбар зураг 17.9 сая ам.долларт хүрсэн явдал юм.

Эх сурвалж: Office life