Нийслэлийн ИТХ-ын Тэргүүлэгчид өнөөдөр хуралдаж, Сайжруулсан түлш нийлүүлэх бэлтгэл ажлыг хангах ажлын хэсэг байгуулах тухай, Газрыг улсын тусгай хэрэгцээнд авах саналыг дэмжих тухай, “Олон улсын худалдаа ложистикийн төв”-ийн хэсэгчилсэн ерөнхий төлөвлөгөөг шинэчлэн батлах тухай зэрэг асуудлуудыг хэлэлцлээ.
Улаанбаатар хотын агаарын бохирдлыг бууруулахаар Засгийн газраас өнгөрсөн онд 62 дугаартай тогтоол гаргаж, ирэх тавдугаар сарын 15-наас нийслэл рүү түүхий нүүрс оруулах, түлшинд хэрэглэхийг хориглосон. Энэ хүрээнд сайжруулсан түлш үйлдвэрлэж, айл өрхөд нийлүүлэх юм. Өнөөдрийн Тэргүүлэгчдийн хуралдаанаар сайжруулсан түлш нийлүүлэх бэлтгэл ажлыг хангах ажлын хэсэг байгуулав. Ажлын хэсгийг нийслэлийн Засаг даргын орлогч Ж.Батбаясгалан ахлах бөгөөд бүрэлдэхүүнд холбогдох албаны төлөөллүүд, төрийн бус байгууллагынхан орж буй. Ажлын хэсэг байгуулж буйтай холбогдуулан нийслэлийн ИТХ-ын Тэргүүлэгчид санал хэллээ.
Тухайлбал, Тэргүүлэгч Н.Батсүмбэрэл “Сайжруулсан түлшийг одооноос нийлүүлж, үр дүнг нь олон нийтэд таниулах хэрэгтэй. Мөн үнийг нь тодорхой болгож, худалдаалах цэгүүдээ оновчтой тодорхойлох ёстой” гэсэн бол Тэргүүлэгч С.Мөнхчулуун “Сайжруулсан түлшнээс худалдан авч, өөрийн сонгогдсон тойргуудад туршилт хийлгэсэн. Үр дүнтэй байна гээд иргэдээс худалдаанд гаргаач гэсэн санал олон ирүүлж байна. Тиймээс хэрэглээнд даруй нийлүүлэх шаардлагатай” гэв. Харин Тэргүүлэгч Ц.Байгалмаа “Сайжруулсан түлшийг өнгөрсөн зун туршихад утаа хаялт нь бага ч асахдаа хүндрэлтэй байсан. Энэ мэтэд анхаарч, энд тэнд бус, тодорхой хэсэгт нүдэнд харагдахуйц туршилт хийж, иргэдэд мэдээлэл өгөх шаардлагатай байна. Мөн үүнийхээ хажуугаар сууцны дулаан алдалтыг багасгах талаар анхаарах” гэв.
Тэргүүлэгч П.Баярхүү түлшийг борлуулахаар тодорхойлсон цэгүүдийн байрлал хэр оновчтой, түүнд нь хэдэн хүн ажиллах юм бэ гэдгийг судлах хэрэгтэйг онцолсон. Мөн өнгөрсөн онд баталсан хорооны Засаг дарга, хэсгийн ахлагч нарыг агаарын чанарын эргүүлээр ажиллуулах тогтоолын хэрэгжилтийг хангуулж, ажлын хэсгийнхэн үйл ажиллагаандаа татан оролцуулах ёстой гэв. Нийслэлийн ИТХ-ын дарга С.Амарсайхан “Агаарын бохирдлыг бууруулахаар холбогдох бүх албанаас ажил санаачилж байгаа. Үүний үр дүн иргэн бүрийн оролцооноос хамаарна. Тиймээс харилцан ойлголцож, хамтарч ажиллаж чадвал агаарын бохирдол буурна.
Ажлын хэсгийнхэн сайжруулсан түлшний үнэ, түгээлт, борлуулах цэгийн мэдээллийг иргэдэд хүргэж, хэрэглэх заавар өгөх хэрэгтэй. Хадгалах агуулах, түгээх цэгүүд хаана байх, одоо түлш худалдаж буй хүмүүсийг үүнд хэрхэн татан оролцуулах юм. Мөн хэдэн ажлын байр нэмэгдүүлэх вэ гэдэгт анхаарч ажиллах ёстой. Түлш иргэдийн худалдан авах чадамжид нийцсэн үнэтэй байхад анхаарч, хэрэглээнд нь хяналт тавих, Улаанбаатар хотын агаарын бохирдлыг бууруулах мастер төлөвлөгөөтэй ажлаа уялдуулж, агаарын чанарын хяналтын байцаагч нарыг үйл ажиллагаанд татан оролцуулах нь зөв. Эцэст нь, лабораторийн шинжилгээний хариу эргэлзээтэй, эсэхийг тодруулж, иргэдэд зөв мэдээлэл хүргэх хэрэгтэй. Одоо үйлдвэрлэж буй бүтээгдэхүүнийг хадгалахаас илүүтэй түгээж, айл өрхүүдийг сайжруулсан түлш хэрэглэхэд хэвшүүлэх нь чухал. Ажлын хэсгийнхэн 14 хоног тутам үйл ажиллагаагаа дүгнэх хэрэгтэй” гэсэн юм.
“Олон улсын худалдаа ложистикийн төв”-ийн хэсэгчилсэн төлөвлөгөөг шинэчлэн батлав
Сонгинохайрхан дүүргийн нутагт, авто худалдааны төвийн 130 га талбайд бүтээн байгуулалт өрнүүлснээр өдгөө тэнд 72 байгууллага үйл ажиллагаа явуулж, 2500 орчим машин худалдахаар байршуулаад буй.Тэгвэл тус цогцолборыг шинэчлэн төлөвлөхөөр боллоо.
Шинэчлэн боловсруулсан төлөвлөгөөгөөр тэнд гаднаа 150 автомашины зогсоол, дотроо 700 лангуутай сэлбэг хэрэгсэл, авто эд анги борлуулах битүү зах, оношлогоо, авто дром, залуусын соёлын төв, төмөр замын ачиж, буулгах гаалийн хяналтын талбай, зорчигч тээврийн авто вокзал байгуулах нь. Үр дүнд нь ирэх 2022 онд 11 мянган ажлын байр бий болж, улсад 72 тэрбум төгрөгийн татвар бүрдүүлэх тооцоог холбогдох албаныхан хийжээ.
Мөн нийгмийн хариуцлагынхаа хүрээнд “Шувуут нуур” экологи амралтын хүрээлэн байгуулах аж. Худалдааны төвд зогсоол, газар эзэмшиж, өмчилсөн иргэд, аж ахуйн нэгжүүд уг бүтээн байгуулалтыг дэмжсэн аж. Тэргүүлэгчид ил зогсоолын тоог анхны төлөвлөлтөөс цөөрүүлэхгүй байхыг үүрэг болгон хэсэгчилсэн төлөвлөлтийг баталлаа. Дашрамд дурдахад, өнөөдрийн хуралдааны үеэр Тэргүүлэгчид Хан-Уул дүүргийн XV хорооны нутаг дахь конторын зориулалттай 1449 ам метр газрыг улсын тусгай хэрэгцээнд авах саналыг дэмжсэн юм.
