Охид, эмэгтэйчүүдийн эрх ашгийг хамгаалах “Охидын түүх” ТББ, талийгаач Ч.Чамин-Эрдэнийн ээж хамтран мэдээлэл хийлээ.

“Охидын түүх” ТББ-ын Гүйцэтгэх захирал Э.Цэцэгсайхан:

"Талийгаач охины талаар янз бүрийн мэдээллүүд гадуур явж байгаа учраас ар гэрийнхнийх нь зүгээс бодитой мэдээллийг өгөхөөр өнөөдрийн хэвлэлийн бага хурлыг хийж байна.

Хүмүүс янз бүрийн байр суурийг илэрхийлж байгаа. Тухайлбал, Боловсрол телевиз, MNTM нэвтрүүлгийн шүүгч нар, цагдаагийн байгууллага гээд тал талаас өөрсдийн байр суурийг илэрхийлж байгаа. Хэрэг гарсан өдөр талийгаач 10 цагт гэрээсээ гараад 16 цагт нас барсан байдалтай олдсон байдаг. Хэргийн талаар охины лифтэнд сууж байгаагаас өөр нотлох баримт байхгүй. Маш бүрхэг байдлаар амиа алдсан хэрэг юм. Боловсрол телевизийн, шүүгч нарын мэдэгдлийг бидний зүгээс тусгайлан авч үзээд дараа нь мэдэгдэл гаргах болно" гэлээ.

Талийгаачийн ээж Г.Чимгээ: 

"Цагдаагийн байгууллагаас миний охины хэргийг хаах гэж оролдож байгаад гомдолтой байна. Охиныг минь амиа хорлосон болгох гэж янз бүрийн аргаар үзэж байна. Би үүнтэй санал нийлэхгүй. Яаж ч бодсон 20 см цонхоор амиа хорлох гэж үсрэх хүн биш. Болохгүй бол би өөрөө 11 давхараас үсэрч, ямар гэмтэл авахыг нь цагдаа, шүүх эмнэлэгт харуулах юмуу. Шүүх эмнэлэгт ч гомдож байна. Яагаад шинжилгээний хариуг худал гаргаж өгөөд байгаа юм. Миний охины футболкыг нь хүртэл сольчихсон байна лээ. Би хэзээ ч шүүх эмнэлгийн гаргасан шинжилгээний хариунд итгэхгүй.

Бас нэг зүйл байна. “MNTM” нэвтрүүлгийн оролцогч Э.Одонтунгалагийн ээж одоог хүртэл маанийн ерөөлийнхөө тухай тайлбар хийгээгүй. Тэмцээний үеэр миний охиныг дарамталж байсан гэдгийг охин минь хэлж байсан. Үргэлж янз бүрээр хараадаг, түүнийг харахаар айдаг гэж. Миний охин худал хэлэх хүн биш. Хэлэх гэснээ хэлчихдэг шудрага нээлттэй хүүхэд. Өнөөдөр Э.Одонтунгалаг америкт жаргаад явж байна. Гэтэл миний охин газар дор, хүйтэн хонгилд хэвтэж байна. Зүгээр байсан хүүхдийг минь яагаад ингэж байгаа юм.

Анх 16 настай байхаасаа эхэлж Ю.Нэмэхбаяртай үерхсэн. Өнөөдөр энэ хүн хаана байна. Солонгос явсан гэх сураг сонссон. Нэг ч удаа утсаар яриагүй. 49 хоногоор нь зул ч өргөөгүй. Цагдаагийн байгууллага Ю.Нэмэхбаярыг энэ хэрэгтэй холбоогүй гэж үзсэн. Энэ хүн яалт ч үгүй шижигтэн.

Би энэ Э.Одонтунгалаг, Ю.Нэмэхбаяр нартай хатуу хариуцлага тооцно. Амийг нь энэ хоёроос нэхнэ" гэлээ

Талийгаачийн үеэл дүү А.Лхамноржин: "Миний эгч өндөр боловсролтой, хүмүүжилтэй, зарчимч хүн. Би багаасаа эгчтэйгээ хамт чөлөөт цагаа өнгөрүүлдэг байсан. Цахим сүлжээгээр миний эгчийг хар тамхи татдаг, архи уудаг, биеэ үнэлдэг, хүмүүжлийн доголдолтой гэж гүтгэж байна. Огтхон ч ийм зүйл байхгүй" хэмээн хэлж байв. 

Мөн энэ хэргийг өмгөөлнө хэмээн хоёр сая төгрөгийн төлбөр авсан Ганбат, Тамир гэх өмгөөлөгчдийг хэрэг дээр огт ажиллаагүй хэмээн үзэж байгаа ар гэрийнхэн болон "Охидын түүх" ТББ-ын зүгээс тэднийг өмгөөллийн төлбөрийг буцааж өгөхийг шаардлаа. Тус мөнгөөр амиа алдсан охидын гэгээн дурсгалыг хүндэтгэн суварга босгоно гэв.

Талийгаачийн ээжийн хувьд сэтгэл санааны хямралд орсон хүнд байдалтай байгаа учраас сэтгүүлчдийн асуултад хариулахгүй хэмээгээд хэвлэлийн хурлаа дуусгалаа.