Цөлжилт, газрын доройтлыг багасгах, бэлчээр, газар ашиглалтыг тогтвортой болгох тухай хэлэлцдэг НҮБ-ын Цөлжилттэй тэмцэх конвенцын Талуудын 17 дугаар бага хурал “СОР17”-ыг Улаанбаатар хотноо зохион байгуулахад 200 хүрэхгүй хоног үлджээ.

СОР 17 Зохион байгуулах үндэсний хорооны мэдээлснээр, дэлхийн улс орнууд одоогоор хүн төрөлхтөнд хамааралтай гурван төрлийн СОР буюу конвенцын Талуудын бага хурал хийдэг. Эхнийх нь НҮБ-ын Уур амьсгалын өөрчлөлтийн тухай суурь конвенц /UNFCCC/-ын талуудын бага хурал. Хүлэмжийн хийг багасгах, уур амьсгалын өөрчлөлтийг сааруулах, дасан зохицох бодлого, түүний санхүүжилтийн тухай хэлэлцдэг тус бага хурал жил бүр болдог. Өнгөрсөн оны 11 дүгээр сард Бразил улсын Белем хотод СОР30 болсон.

Удаах нь НҮБ-ын Биологийн олон янз байдлын конвенц /CBD/-ын талуудын бага хурал. Ургамал, амьтан, экосистемийг хамгаалах, байгалийн баялгийг тогтвортой ашиглах тухайд хэлэлцдэг тус бага хурал хоёр жилд нэг удаа болдог. СОР17 энэ оны 10 дугаар сард Армени улсын нийслэл Ереван хотод болох юм.

СОР нь хурал, уулзалт төдий бус бодлого, шийдвэр, үр дүн гарах үйл ажиллагаа, үүрэг хариуцлага гэсэн үг бөгөөд улс орнуудын байгаль орчин, хөдөө аж ахуй, бизнес, иргэний нийгмийн байгууллага, энгийн иргэд гээд бүх л салбарын төлөөлөл нэгэн дээвэр, уриа дор цуглан агаар, амьд оршихуй, газрын өнөөгийн нөхцөл байдал, ирээдүйн тухай хэлэлцэн бодлого боловсруулж, шийдвэр гарган, хөрөнгө босголцож хэрэгцээ, шаардлагатай үйл ажиллагааг явуулдаг уламжлалтай ажээ.