Америкийн бизнесмен, талийгаач Фил Бахманы автомашины гайхамшигт цуглуулгад багтсан шар өнгийн Ferrari Enzo суперкар Mecum-ийн дуудлага худалдаагаар 17.9 сая ам.доллароор зарагджээ. Энэ нь Enzo загварын түүхэнд дуудлага худалдаагаар зарагдсан хамгийн өндөр үнэ болж, 2023 онд 6 сая ам.доллароор тогтоогдож байсан өмнөх дээд амжилтыг эвдлээ.
Ийнхүү өндөр үнэ хүрэх болсон шалтгаан нь тус машин ердөө 1044 км гүйлттэй, маш ховор эд юм. Энэ нь АНУ-ын зах зээлд зориулан үйлдвэрлэсэн 127 машины нэг бөгөөд үйлдвэрээс "Giallo Modena" буюу шар өнгөтэй гарсан ердөө 36 машины нэг аж. Мөн суудлын бүрээс нь улаан, шар өнгө хосолсон онцлогтой.
Фил Бахманы цуглуулгын бусад машинууд ч мөн үнийн дээд амжилт тогтоов. Тухайлбал, Ferrari 288 GTO 8.53 сая, 737 км гүйлттэй Ferrari F40 6.6 сая, Ferrari F50 12.21 сая, LaFerrari 6.71 сая, түүний сайжруулсан загвар болох LaFerrari Aperta 11 сая, харьцангуй шинэ загвар болох 599 GTO 3.96 сая ам.доллароор тус тус зарагджээ.
Фил Бахман 1984 оноос хойш Италийн Ferrari брэндийн 46 автомашин цуглуулсан бөгөөд зөвхөн шар өнгийн болон тухайн загварын хамгийн сүүлд үйлдвэрлэгдсэн машинуудыг сонгон авдгаараа алдартай байв.
Эх сурвалж: officelife.media
