Сирид баривчлагдсан “Лалын улс” бүлэглэлийн 7 мянга хүртэлх тооны гишүүдийг Ирак руу шилжүүлж магадгүй гэж АНУ-ын Зэвсэгт хүчний Төв командлал мэдэгджээ.

Эхний ээлжинд тус бүлэглэлийн 150 гишүүнийг Сирийн зүүн хойд нутгийн Хасака мужаас Ирак дахь “аюулгүй газрууд” руу шилжүүлсэн байна.

Баривчлагдсан террористуудыг шилжүүлэх болсны шалтгаан нь даваа гарагт Ирактай залгаа хилийн бүсэд орших Аль-Шаддади шоронгоос "Лалын улс"-ын гишүүд оргосон явдалд Сирийн ардчилсан хүчнүүд ба Сирийн засгийн газар харилцан бие биеэ буруутгасантай холбоотой ажээ.

Курдүүдээр удирдуулсан Сирийн ардчилсан хүчнүүд одоогоор "Лалын улс"-ын 9000 орчим гишүүн хоригдож буй 10 гаруй шоронг хяналтдаа байлгасаар байна.

"Лалын улс" бүлэглэл нь Иракт 2017 онд, Сирид 2019 онд ялагдсан боловч хоёр улсад халдлага үйлдсээр байгаа тул бүс нутагт аюул занал учруулсан хэвээр байгаа юм.

Сирид суугаа АНУ-ын Элчин сайд Том Бэррак мэдэгдэхдээ, "Лалын улс"-тай тэмцэхэд гүйцэтгэж ирсэн Сирийн ардчилсан хүчнүүдийн үүрэг “дуусгавар болсон, учир нь одоо Сирийн эрх баригчид аюулгүй байдлыг хангах үүргийг өөртөө хүлээж авахад бэлэн болсон” гэжээ.

Сирийн Гадаад хэргийн яам "Лалын улс"-ын хоригдлуудыг саатуулж буй газруудыг эрх баригчдад шилжүүлж буйг сайшаан хүлээн авч, үүнийг “аюулгүй байдал, тогтвортой байдлыг бэхжүүлэх чухал алхам” гэж нэрлэсэн байна.

Мөн Сирийн лагериудад одоогоор 24 мянга орчим хүн байсаар байгаа бөгөөд тэдний ихэнх нь "Лалын улс"-ын гишүүдийн эхнэр, хүүхдүүд ажээ. Тэдний 14 500 орчим нь сиричүүд, 3000 шахам нь иракчууд, мөн дэлхийн өнцөг булан бүрээс ирж тус бүлэглэлд нэгдсэн 6500 орчим хүн бий гэж мэдээлжээ.

Эх сурвалж: Кazinform