Монгол Улс Зэвсэг хураах бага хурлын 2026 оны эхний даргын хувиар нэгдүгээр сарын 20-нд хурлын анхны нэгдсэн хуралдааныг НҮБ-ын Женев дэх төв байранд хуралдуулав. Хурлыг Монгол Улсаас НҮБ-ын Женев дэх төвийн дэргэд суугаа Байнгын төлөөлөгч Д.Гэрэлмаа даргалав.
Байнгын төлөөлөгч ЗХБХ-ыг нээж хэлсэн үгэндээ Монгол Улсад итгэл хүлээлгэсэн гишүүн орнуудад талархал илэрхийлж, даргын үүргийг шударга, ил тод, бүтээлч хамтын ажиллагаанд тулгуурлан хэрэгжүүлэхээ мэдэгдэв. Тэрбээр 2026 он нь олон улсын зэвсэг хураах хэлэлцээний хувьд онцгой ач холбогдолтой жил бөгөөд Цөмийн зэвсгийг үл дэлгэрүүлэх гэрээний хэрэгжилтийг хянан хэлэлцэх бага хурал болон шинэ төрлийн зэвсгийн системийн талаарх хэлэлцүүлгүүд эрчимжиж буйг онцоллоо.
Монгол Улс цөмийн зэвсэггүй бүсийн статустай, энх тайванч, дүрэмд суурилсан олон улсын хамтын ажиллагааг тууштай дэмждэг орны хувьд ЗХБХ-ын ажлыг урагшлуулахын төлөө ажиллах болно гэдгээ илэрхийлэв. Мөн стратегийн үл итгэлцэл нэмэгдэж буй өнөөгийн нөхцөлд ЗХБХ нь яриа хэлцээ, дипломат ажиллагаа, хамтын хариуцлагыг бэхжүүлэх гол талбар хэвээр байгааг тэмдэглэв.
2026 оны хуралдаан гурван үе шаттай үргэлжлэх бөгөөд Монгол Улс даргалах хугацаандаа цөмийн зэвсгийг хорогдуулах, сөрөг аюулгүй байдлын баталгаа, сансрын уудамд зэвсгийн өрсөлдөөнөөс сэргийлэх, цэргийн зориулалттай шинэ технологийн зохицуулалт зэрэг үндсэн сэдвүүдээр үр дүнд чиглэсэн хэлэлцүүлэг өрнүүлэх зорилт тавин ажиллаж байна.
Нээлтийн хуралдаанд оролцсон төлөөлөгчид Монгол Улсад амжилт хүсэж, өнөөгийн геополитикийн нөхцөл байдалд ЗХБХ-ын үүрэг улам бүр нэмэгдэж буйг тэмдэглэж, олон жил үргэлжилсэн зогсонги байдлыг даван туулахын тулд улс төрийн шинэ эрмэлзэл шаардлагатай гэв.
Хуралдааны үеэр ЗХБХ-ын 2026 оны хэлэлцэх асуудлын жагсаалтыг баталж, энэ жилийн ажлын үндсэн хүрээг тодорхойлов.
ЗХБХ нь 65 гишүүнтэй, олон улсын аюулгүй байдал болон стратегийн тогтвортой байдлыг хангах чиглэлээр яриа хэлэлцээ явуулдаг НҮБ-ын цорын ганц байнгын олон талт форум бөгөөд цөмийн зэвсгийг хорогдуулах, шинэ төрлийн зэвсгийн өрсөлдөөнөөс урьдчилан сэргийлэх, улс орнуудын аюулгүй байдлын баталгааг хэлэлцэх зэрэг дэлхийн энх тайван, тогтвортой байдалд шууд нөлөөлөх асуудлуудыг авч үздэг. Түүнчлэн улс орнуудын байр суурийг ойртуулах, итгэлцлийг сэргээх, олон жил гацсан хэлэлцээг урагшлуулах боломж олгодгоороо энэ форум олон улсын хамтын нийгэмлэгийн хувьд онцгой ач холбогдолтойд тооцогддог.
