Дэлхийн хамгийн үнэ цэнтэй брэндүүдийн жагсаалтыг Apple компани дахин тэргүүлсэн тухай Brand Finance байгууллагын “Global 500-2026 оны дэлхийн хамгийн үнэ цэнтэй 500 брэнд” тайланд дурджээ.

Apple брэндийн үнэлгээ 607.6 тэрбум ам.долларт хүрсэн нь өнгөрсөн оны 574.5 тэрбум гэсэн үзүүлэлтийг давсан байна. Ингэснээр тус компани дэлхийн хэмжээнд брэндийн үнэлгээгээр тэргүүлэх байр сууриа хадгаллаа.

Жагсаалтын хоёрдугаарт 565.3 тэрбум ам.долларын үзүүлэлтээр Microsoft бичигдсэн бол гуравдугаарт Google компани оржээ. Google-ийн брэндийн үнэлгээ 433.1 тэрбум ам.доллар болжээ. 2025 онд Microsoft-ийн үнэлгээ 461.1 орчим тэрбум ам.доллар, Google-ийнх 413 тэрбум ам.доллар байсан юм.

Хамгийн үнэ цэнтэй брэндүүдийн эхний аравт мөн Amazon (369.9 тэрбум ам.доллар), Nvidia (184.3 тэрбум ам.доллар), Хятадын TikTok (153.5 тэрбум ам.доллар), АНУ-ын жижиглэн худалдааны Walmart сүлжээ дэлгүүр (141 тэрбум ам.доллар), Өмнөд Солонгосын Samsung компани (119.2 тэрбум ам.доллар), Facebook (107 тэрбум ам.доллар) болон Хятадын State Grid компани (102.4 тэрбум ам.доллар) багтжээ.

Тайланд дурдсанаар, Global 500 жагсаалтад багтсан брэндүүдийн тоогоор АНУ тэргүүлсэн байна. Нийт 500 том брэндээс 192 нь Америкийнх ажээ. Дараагийн байруудад Хятад 68 брэндээрээ, Япон болон Франц тус бүр 33, Герман 26, Их Британи 25 брэндээрээ жагссан байна.

Дэлхийн эдийн засгийн өсөлт сул байсан хэдий ч дэлхийн хамгийн үнэ цэнтэй 500 брэндийн нийт үнэлгээ өнгөрсөн жилийнхтэй харьцуулахад 10 хувиар өсөж, 10.4 их наяд ам.долларт хүрсэн байна.. Брэндүүдийн үнэлгээний өсөлт нь дэлхийн эдийн засгийн өсөлтөөс 3.2 хувиар илүү байна.

Дэлхийн брэндийн зах зээлийн 53.4 хувийг АНУ эзэлж, нийт үнэлгээ нь 5.5 их наяд ам.долларт хүрч байгааг тайланд онцолсон байна. Хятадын тухайд 15 хувь буюу 1.6 их наяд ам.доллар, Герман 5.6 хувь, Япон 4.7 хувь, Франц 4 хувийг тус тус эзэлжээ. Харин хамгийн бага хувийг Аргентин эзэлж байгаа бөгөөд тус улс ердөө 6 тэрбум ам.долларын үнэлгээ бүхий ганцхан брэндтэй байна.

Салбаруудаар нь авч үзвэл, хамгийн их хувийг нийт 1.3 их наяд ам.долларын үнэлгээтэй 79 брэнд бүхий банкны салбар эзэлжээ. Удаад нь медиа, электроник, интернэт ба программ хангамжийн компаниуд, мөн жижиглэн худалдааны салбарууд орж байна.

Жилийн хугацаанд брэндийн үнэ цэн нь хамгийн их өссөн компани бол Их Британийн "Revolut" гэдэг финтек компани бөгөөд тус компанийн брэндийн үнэлгээ 239 хувиар өсжээ. Харин Tesla компанийн брэндийн үнэлгээ 35.8 хувиар буурсан байна.

Эх сурвалж: Anadolu