Улсын драмын эрдмийн театрын уран бүтээлчид Оросын нэрт зохиолч Лев Толстойн романаас сэдэвлэсэн “Анна Каренина” жүжгийг хоёрдугаар сарын 11-нээс тайзнаа толилуулна.
Монголын үзэгчдэд анх 2020 онд хүргэж байсан энэхүү жүжигт эмэгтэй хүний эмзэг нандин чанар, хайр сэтгэлийн төлөөх тэмцэл болоод гэр бүл, хосын харилцаа, амьдралын тухай өгүүлдэг. Тус романыг жүжгийн зохиол болгон Н.Пүрэвдагва бичсэн бол Төрийн соёрхолт, Урлагийн гавьяат зүтгэлтэн Н.Наранбаатар найруулж, зураачаар УДЭТ-ын ерөнхий зураач Т.Ганхуяг, хөгжмийн зохиолчоор Ш.Өлзийбаяр нар ажилласан юм.
Хоёр бүлэг, 23 үзэгдэлт уг жүжгийг УДЭТ шинэ бүрэлдэхүүн, шинэ Аннатайгаар өнгөрсөн тавдугаар сард үзэгчдийн хүртээл болгосон. Анхны Анна Каренинагийн дүрийг МУСТА Н.Баярмаа амилуулж байсан бол энэ удаа залуу жүжигчин О.Хонгорзулын тоглосноор үзэгчдэд хүрэх юм.
Оросын алдарт зохиолч Л.Н.Толстой “Анна Каренина” романыг 1873-1877 онд бичиж, 1878 онд бүрэн эхээр нь анх хэвлүүлсэн. Утга зохиол шүүмжлэгчид энэхүү зохиолыг бүх цаг үеийн хамгийн шилдэг зохиол хэмээн үнэлжээ.
