АНУ-ын Ерөнхийлөгч Дональд Трамп Владимир Путин, Александр Лукашенко нарын Газын зурвасын асуудлыг зохицуулах шинэ байгууллага болох "Энх тайвны зөвлөл"-ийн үйл ажиллагаанд оролцохыг урьжээ.

Кремлийн хэвлэлийн албанаас мэдээлснээр, уг саналыг одоогоор судалж байгаа бөгөөд саналын талаарх нарийн ширийн зүйлсийг Америкийн талтай хэлэлцэх явцад тодорхой болгох аж. Харин Беларусийн Гадаад хэргийн яамнаас мэдээлэхдээ, А.Лукашенко санаачилгыг нааштай хүлээн авч, уг байгууллагын ажилд оролцох бэлэн гэдгээ илэрхийлжээ.

Үүнээс өмнө Казахстан, Унгар улсууд мөн адил урилга авснаа мэдэгдсэн байна. Казахстаны Ерөнхийлөгч Касым-Жомарт Токаев Ойрх Дорнод дахь тогтвортой байдлыг бэхжүүлэх, улс орон хоорондын итгэлцлийг хөгжүүлэхэд хувь нэмэр оруулах хүсэлтэйгээ илэрхийлжээ. Унгарын Ерөнхий сайд Виктор Орбан "Энх тайвны зөвлөл"-д нэгдэхэд бэлэн гэдгээ мөн мэдэгдсэн байна.

Энэхүү урилгыг Европын Холбооны хэд хэдэн гишүүн орон, Турк, Канад, Узбекстан зэрэг 60 улс, мөн Европын Комиссын дарга Урсула фон дер Ляйен хүлээн авчээ. Харин Францын Ерөнхийлөгч Эммануэл Макрон Д.Трампын санаачилгад оролцох төлөвлөгөөгүй байна. Хятад улс урилга аваагүй бол Герман улс Олон улсын энх тайвны асуудлыг зохицуулахад НҮБ-ын гол үүргийг онцлон, саналд хүлээцтэй ханджээ. Аргентин, Унгар, Турк, Пакистан, Египет, Иордан, Катар, Итали улсууд урилгыг хүлээн авсан бөгөөд оролцоно гэдгээ мэдэгдсэн байна.

АНУ-ын засаг захиргаанаас санаачилсан энэхүү зөвлөл нь стратегийн хяналт тавих, олон улсын нөөцийг татан төвлөрүүлэх, Газын зурвасыг хөгжүүлэх үүрэг, амлалт биелэлтийг хянах үүрэгтэй байх юм. Цагаан ордноос мэдээлснээр, Үүсгэн байгуулах гүйцэтгэх зөвлөлд (founding executive board) дипломат, хөгжил, дэд бүтэц, эдийн засгийн стратегийн чиглэлээр туршлагатай 7 удирдагч багтана.

Дональд Трамп өмнө нь энэхүү шинэ байгууллагыг “урьд өмнө хэзээ ч, хаана ч байгуулагдаж байгаагүй хамгийн нэр хүндтэй зөвлөл байх болно” гэж мэдэгдсэн юм.

Эх сурвалж: Kazinform