Өнгөрсөн онд Хятад улсад төрөлтийн тоо 1949 оноос статистик хөтөлж эхэлснээс хойших хамгийн доод түвшинд хүрч, хүн амын тоо дөрөв дэх жилдээ дараалан буурчээ.

Тус улсын Үндэсний статистикийн товчооноос даваа гарагт мэдээлснээр, өнгөрсөн оны эцсийн байдлаар Хятадын эх газрын хүн амын тоо 1 тэрбум 405 орчим сая байсан нь өмнөх оныхтой харьцуулахад 3.39 орчим саяар цөөрсөн үзүүлэлт юм.

Хятадын хүн ам хурдтай хөгширч, төрөлт буурч байгаагаас үүдэн ажиллах хүчний хомсдол зэрэг нийгмийн асуудлуудтай тулгараад байна. 2016 онд тус улсад нэг хүүхдийн бодлогыг цуцалж, гурван хүүхэдтэй болохыг зөвшөөрсөн билээ.

Хятадын засгийн газар төрөлтийн түвшин буурч байгааг зогсоох зорилгоор хүүхэд асрах тэтгэмжийн хөтөлбөрийг өнгөрсөн оноос хэрэгжүүлж эхэлсэн бөгөөд уг хөтөлбөрийн хүрээнд 3 хүртэлх насны хүүхэд бүрд жилд 3.600 юань буюу 500 орчим ам.доллар олгож байгаа юм. Зарим орон нутгийн засаг захиргаа өөрсдийн гэсэн тусгай тэтгэлгийн хөтөлбөрүүдийг мөн хэрэгжүүлж эхэлсэн байна.

Гэсэн хэдий ч эдгээр арга хэмжээ нь эдийн засгийн хямрал, боловсролын өртөг нэмэгдэж буй нөхцөлд үр дүнтэй байх эсэх нь тодорхойгүй байгаа бөгөөд гэр бүлийн талаарх залуусын хандлага ч өөрчлөгдөж эхэлжээ.

Эх сурвалж: NHK