Өвлийн аялал жуулчлалын бүс нутаг болох Хөвсгөл аймгийн Рэнчинлхүмбэ сумын нутаг дахь голын нэрийг нутгийн иргэд болон аялагчид “Жарганат” эсвэл “Жаргант” хэмээн нэрлэдэг.
Энэ голын нэрийг зөв дуудаж хэвшихийг Газар зохион байгуулалт, геодези, зураг зүйн ерөнхий газраас иргэдэд уриалжээ. УИХ-ын 2003 оны 42 дугаар тогтоолоор тус голын нэрийг албан ёсоор “Жаргалант гол” гэж баталсан бөгөөд албан ёсны газар зүйн нэрээр хойч үедээ өвлүүлэн үлдээхийг зөвлөсөн байна.
Рэнчинлхүмбэ сумын төвөөс 5 км зайд оршдог Жаргалантын гол нь -50 градуст хөлддөггүй учраас нутгийн иргэд “амьд устай” гол гэж үздэг. Жаргалантын голын харзанд өвлийн улиралд иргэд ихээр очдог бөгөөд гол дотор ургасан өвс, ургамал ногооноороо цэцэглэн ургадаг байна.
Мөн голын уснаас үүссэн уур, манан ойр орчмын мод, бутыг цантуулж, өвлийн улиралд үзэсгэлэнтэй болгодог тул гадаад, дотоодын аялагчид зорин очиж, зургаа авхуулдаг болсон юм. Голын ус маш гүнээс гардаг тул зуны улиралд их хүйтэн байдаг.
Жаргалантын гол нь Улаанбаатар хотоос 973 км, Мөрөн хотоос 245 км, Рэнчинлхүмбэ сумаас 5 км-ийн зайд оршдог.
