Өчигдөр буюу ням гаригийн орой орон нутгийн цагаар 19:45 цагийн үед Испанийн Кордова мужид хоёр хурдны галт тэрэг мөргөлдсөний улмаас 21 хүн амиа алдаж, 100 орчим хүн гэмтэж бэртсэн байна. Мөн 30 хүний биеийн байдал маш хүнд байгаа тухай Испанийн Дотоод хэргийн яам мэдээлжээ.
Малага хотоос нийслэл Мадридын чиглэлд явж байсан Iryo компанийн галт тэрэг замаасаа гарч, хажуугийн замаар өмнөөс нь ирж явсан галт тэрэгтэй мөргөлдсөн байна. Уг хоёр галт тэргээр нийтдээ 400 хүн зорчиж явжээ.
Испанийн Ерөнхий сайд Педро Санчес үүссэн нөхцөл байдлыг онцгойлон анхааралдаа авснаа мэдэгдсэн бол Испанийн эзэн хааны гэр бүлийнхэн хохирогчдын ар гэрийнхэнд эмгэнэл илэрхийлсэн байна.
Ослоос амьд үлдсэн байж магадгүй хүмүүсийг аврагчид эрэн хайсаар байгаа бөгөөд мөргөлдөх үед хамгийн хүчтэй цохилтод өртсөн вагонууд дотор байсан хүмүүсээс хэд нь амьд үлдсэнийг тодорхойлох боломжгүй байгаа юм.
Кордова мужийн захирагч Адамус ослын газарт хамгийн түрүүнд ирсэн бөгөөд тэрбээр танигдахын аргагүй болтлоо зэрэмдэглэгдсэн зорчигчийн цогцсыг харснаа ярьсан байна. Мөн Малагагийн галт тэргэнд сууж явсан телевизийн RTVE сувгийн сэтгүүлч Сальвадор Хименес ярихдаа, хоёр галт тэрэг маш хүчтэй мөргөлдсөн тул газар хөдөлсөн мэт доргилт үүсжээ.
