Европын Холбоо ба Өмнөд Америкийн дөрвөн улсын байгуулсан Меркосур эдийн засгийн холбооны хооронд өргөн хүрээтэй худалдааны гэрээнд гарын үсэг зурах ёслолын ажиллагаа бямба гаригт Парагвайн нийслэл Асуньон хотод болов.

Уг баримт бичигт Европын Холбоо болон Меркосурын бүрэлдэхүүнд багтдаг Бразил, Аргентин, Парагвай, Уругвай улсуудын төлөөлөгчид гарын үсэг зурав. Ингэснээр Европын Холбоо /ЕХ/ болон Өмнөд Америкийн 27 улс дэлхийд томоохонд тооцогдох чөлөөт худалдааны бүсийг байгууллаа.

Ёслолын ажиллагаанд Европын зөвлөлийн дарга Антониу Кошта, Европын комиссын дарга Урсула фон дер Ляйен нар оролцсон байна. “Татварын оронд шударга худалдааг, өөрсдийгөө тусгаарлахын оронд үр дүнтэй удаан хугацааны түншлэлийг бид сонголоо” гэж фон дер Ляйен онцлон тэмдэглэлээ.

Гарын үсэг зурах ёслолд мөн Парагвай, Уругвай, Аргентин, Боливи, Панам улсуудын ерөнхийлөгч нар, Бразилын Гадаад хэргийн сайд оролцов.

Чөлөөт худалдааны гэрээг байгуулах асуудлаарх хэлэлцээ 2000 онд эхэлж, 25 жилийн турш үргэлжилжээ. Талууд удаан хугацааны туршид гэрээний нөхцлүүдийг тохиролцохоор ажиллаж, дэлхийн худалдаанд томоохон өөрчлөлтүүд гарч буй үед гэрээг боловсруулж бэлэн болгожээ. Энэхүү гэрээ нь Европ ба Өмнөд Америкийн улсуудын хооронд худалдаа-эдийн засгийн харилцааг өргөжүүлэх нэмэлт боломжуудыг нээн өгч байна.

Тодорхой хэлбэл, нийт 718 сая хүн амтай, 22.4 их наяд долларын ДНБ бүхий улс орнууд чөлөөт худалдааны бүсийг байгууллаа. Меркосур бол Аргентин, Уругвай, Парагвай, Бразил, Боливи гэсэн Өмнөд Америкийн улсуудыг нэгтгэдэг эдийн засгийн холбоо бөгөөд 300 сая хүн амтай, тус тивийн ДНБ-ий 75 гаруй хувийг бүрдүүлдэг.

Сануулахад, энэ сарын 9-ний өдөр Брюссельд  суугаа Европын Холбооны төлөөлөгчид удаан хэлэлцсэний эцэст уг хэлэлцээрийг дэмжсэнээр түүнийг эцэслэн батлах зам нээгдсэн юм. Хэлэлцээрийг батлахын тулд Европын Холбооны гишүүн 27 улсын 15 нь дэмжсэн санал өгөх шаардлагатай байв.