Хоёр жил дараалан хасах үзүүлэлттэй байсан Германы эдийн засаг өнгөрсөн онд 0,2 хувиар өссөн тухай Холбооны улсын статистикийн газар өчигдөр мэдээлжээ.
Тус улсын эдийн засаг 2024 онд 0,5 хувиар, 2023 онд 0,9 хувиар тус тус агшсан байна.
Эдийн засагчдын таамаглаж байгаагаар, энэ онд Европын хамгийн том эдийн засгийн өсөлт 1 орчим хувьд хүрэх төлөвтэй байна. Үүнд ажлын өдрүүдийн тоо нэмэгдсэн, армийн зэвсэглэл ба дэд бүтцийг шинэчлэхэд улсын төсвөөс гаргаж буй хөрөнгө оруулалтын хэмжээ нэмэгдсэн нь голлон нөлөөлнө.
Харин өмнөх жилүүдэд эдийн засаг хасах үзүүлэлттэй гарсан нь юуны түрүүнд Орос-Украины дайнаас шалтгаалан эрчим хүчний эх үүсвэрүүдийн үнэ өссөн, мөн АНУ-ын зүгээс Германы экспортлогчдод өндөр татвар ногдуулсан, Хятадын зүгээс өрсөлдөөн ширүүссэнтэй холбоотой гэдгийг Berenberg Bank-ны шинжээч Феликс Шмидт дурдлаа.
Эдгээр гадаад хүчин зүйлээс гадна дотоодын асуудлууд ч эдийн засаг агшихад нөлөөлсөн байна. Тухайлбал, хэтэрхий их хүнд суртал, ажиллах хүчний дутагдал, нийгмийн халамжийн зардлын өсөлт зэргийг дурдаж болно.
Харин одоо аж үйлдвэрийн салбарт тогтворжилтын шинж тэмдгүүд ажиглагдаж эхэлснийг шинжээч онцолсон байна. Үүний зэрэгцээ төсвийн алдагдал 8 тэрбум еврогоор буурч, ДНБ-ий 2,4 хувийг эзэлсэн байна. Өмнө нь энэ үзүүлэлт 2024 онд 2,7 хувь, 2023 онд 2,5 хувь байжээ.
Үүний сацуу дэлхийн томоохон үнэлгээний агентлагууд Германы санхүүгийн бодлогыг “тогтвортой” гэж үзээд, зээлжих зэрэглэлийн AAA буюу хамгийн сайн, эрсдэл багатай гэсэн үнэлгээг өгсөн байна. Гэсэн хэдий ч шинэчлэл хийх шаардлагатай гэдгийг дээрх агентлагууд анхааруулжээ. Германы хүн ам хөгширч байгаагаас шалтгаалан холбооны улсын төсвөөс тэтгэврийн санг дэмжихэд олгодог татаасын хэмжээ 2029 он гэхэд 113 тэрбум еврод хүрч нэмэгдэхээр байгаа нь холбооны төсвийн 20 орчим хувийг эзлэх юм.
Эх сурвалж: DW
