Өнгөрсөн онд дэлхий даяар борлуулсан цахилгаан автомашины тоо өмнөх 2024 оныхтой харьцуулахад 20 хувиар өсөж, 20,7 саяд хүрсэн байна. Энэ тухай Лондонд байрладаг дүн шинжилгээний Benchmark Mineral Intelligence компанийн мэдээлэлд дурджээ.

Эдгээр машинаас 13 сая орчмыг нь Хятадад борлуулсан байна. Дотоодын өрсөлдөөн ширүүсч, үнийн хатуу бодлого үйлчилж, автомашинуудын загвар олширч буй өнөөгийн нөхцөлд тус улс дахь борлуулалтын хэмжээ 2024 оныхтой харьцуулахад 17 хувиар өсжээ. Өрсөлдөөн ширүүсэхийн хэрээр Хятадын үйлдвэрлэгчид гадаад зах зээл рүү анхаарлаа хандуулж байгаа бөгөөд Өмнөд Америк, Зүүн Өмнөд Ази, Төв Азийн орнууд дахь борлуулалт нь дэлхий даяарх өсөлтийн гол хүчин зүйл болсон байна.

Үүний сацуу Хятадын брэндүүд Европын зах зээл дэх борлуулалтын 19 хувийг эзэлжээ. Benchmark Mineral Intelligence компанийн мэдээлэлд дурдсанаар, энэ онд Хятадад борлуулж буй цахилгаан автомашинуудад анх удаа татвар ногдуулж эхлэх ажээ. Үүний сацуу, өмнө нь 2025 онд тогтсон нэг хэмжээгээр ижил татаас олгож байсан бол шинэ хөтөлбөрийн дагуу цахилгаан автомашины үнээс хамааруулан татаас олгохоор шийдвэрлэсэн байна. Ингэснээр татаасын хэмжээ энэ онд буурах нь тодорхой болжээ.

Европын зах зээл дэх өсөлт

Өнгөрсөн онд Европт борлуулсан цахилгаан автомашины тоо жилийн дүнгээр 33 хувиар өссөн байна. Тус тивийн томоохон улсууд татаасаа нэмэгдүүлснээр худалдан авагчдыг илүү хүчтэй дэмжих болжээ.

Түүнчлэн дотоод шаталтын хөдөлгүүртэй шинэ автомашины борлуулалтад тавьсан хоригийг зөөлрүүлэхэд чиглэсэн заалтуудыг хуульд оруулах гэж байгаа нь цахилгаан автомашины зах зээлд чухал үйл явдал болно. Удахгүй суудлын автомашин, бага оврын ачааны машинуудад тавих нүүрстөрөгчийн ялгарлын стандарт шаардлагуудыг дахин авч хэлэлцэх ажээ. Тодруулбал, 2035 он гэхэд автомашины яндангаас ялгарах хорт хийг 100 хувь бууруулна гэсэн шаардлагыг 90 хувь болгож багасгана. Үлдсэн 10 хувийг нь Европын Холбооны орнуудад үйлдвэрлэдэг нүүрстөрөгч багатай ган болон е-түлш, био түлшийг ашиглан бууруулах ажээ.

Хойд Америкийн зах зээл дэх тогтворгүй байдал

Өнгөрсөн онд Хойд Америкт буюу АНУ, Канад, Мексикт борлуулсан цахилгаан автомашины тоо нийт дүнгээрээ 4 хувиар буурч, 1,8 сая болсон нь тус тивийн зах зээл тогтворгүй байгааг харууллаа. 2025 оны есдүгээр сарын 30-наас цахилгаан автомашинд зориулсан татварын хөнгөлөлтийг цуцалсан болон худалдааг ивээх протекционист бодлогын нөлөөгөөр АНУ дахь борлуулалт ердөө 1 хувиар өссөн байна.

Мөн өнгөрсөн оны эхээр Канадад татаасыг цуцалснаар цахилгаан автомашины борлуулалт шууд 41 хувиар унажээ. Харин Хятадын цахилгаан автомашиныг олноор нь импортолсон Мексик улсад борлуулалт 29 хувиар өссөн байна.

Хэрэглэгчдийг дэмжих урамшуулал хязгаарлагдмал, цахилгаан автомашины үйлдвэрлэлийг дэмжих хуулийн орчин сул, мөн хөрөнгө оруулалт багасна гэсэн болгоомжлол зэргээс үүдэн энэ онд Хойд Америкийн зах зээл дэх борлуулалт төдийлөн нэмэгдэхгүй бололтой.

Эх сурвалж: Anadolu