Америкийн иргэн эмэгтэй буудуулан амиа алдсантай холбоотойгоор хүний эрхийн зөрчлийн хэрэг үүсгэн мөрдөн шалгах хангалттай үндэслэл алга гэж АНУ-ын Хуульзүйн дэд сайд Тод Бланш мэдэгджээ.
Хэдхэн хоногийн өмнө Миннесота муж улсын Миннеаполис хотод цагаачдыг баривчлан саатуулах ажиллагааны үеэр АНУ-ын Цагаачлалын албаны ажилтан уг эмэгтэйг буудан хөнөөсөн хэрэг гарсан билээ. Телевизийн CBS сувгийн мэдээлснээр, буудуулсан эмэгтэй нь АНУ-ын иргэн, Миннеаполис хотын оршин суугч 37 настай яруу найрагч Рене Гүүд байжээ.
Эрх баригчдын баталж байгаагаар, уг эмэгтэй цагаачлалын албаны ажилтныг машинаараа дайрах гэж оролдсон байна. Ерөнхийлөгч Д.Трамп мэдэгдэхдээ, талийгаач эмэгтэй “зориуд санаатайгаар” ажилтныг дайрахаар завдсан гэжээ. АНУ-ын Цагаачлал, гаалийн албанаас /ICE/ цагаачдыг баривчлах ажиллагаа явуулах үеэр энэхүү ноцтой хэрэг гарсан байна.
Харин хэрэг явдлыг нүдээрээ харсан иргэний хийсэн дүрс бичлэгийг үзвэл, Р. Гүүд дайрах үйлдэл хийгээгүй байна. Цагаачлалын албаны ажилтнууд талийгаачийн машинд дөхөж ирээд түүнийг машинаасаа буухыг шаарджээ. Нэг ажилтан жолоочийн талын хаалганы бариулаас барьж, нөгөө нь капотны ойролцоо зогсож байв. Жийп машины жолооч эмэгтэй хөдлөхөөр оролдох үед 2-3 удаа буун дуу гарч, улмаар машин жолоодлогоо алдаж, хажуугийн зогсоолд байсан машиныг мөргөөд зогсжээ.
Рене Гүүд амиа алдсаны дараа хэрэг болсон газарт хүмүүс цугларч, түүний дурсгалыг хүндэтгэсэн байна. Үүний дараа Миннеаполис болон Миннесота муж улсын бусад хотод цагаачлалын алба, Трампын засаг захиргааны үйл ажиллагааг эсэргүүцсэн жагсаал цуглаанууд болжээ.
Эх сурвалж: Anadolu Ajansi
