Японы Ерөнхий сайд Такаичи Санаэ, БНСУ-ын Ерөнхийлөгч Ли Жэ Мён нар мягмар гарагт Нара хотод (Такаичигийн төрсөн мужийн нийслэл) уулзсаныхаа дараа хамтдаа бөмбөр тоглосон нь тэдний нөхөрсөг харилцааг харуулсан гэнэтийн үйл явдал боллоо.

Тэд дэлхийд алдартай BTS хамтлагийн хит дуу болох "Dynamite"-ыг, мөн АНУ-ын "Алтан бөмбөрцөг" наадмаас шагнал хүртсэн "Kpop Demon Hunters" анимейшн киноны "Golden" дууны хэмнэлийг бөмбөрөөр тоглосон байна. Өмнөд Солонгосын Засгийн газрын мэдээлснээр, Такаичи тоглолтыг удирдаж, Ли-д бөмбөр тоглохыг зааж өгсөн байна.

Энэхүү бөмбөр тоглох арга хэмжээ нь хамтарсан хэвлэлийн хурлын дараа Такаичигийн зохион байгуулсан оройн зоогийн өмнө болсон бөгөөд энэ тухайд Ли Жи Мёны хоёр өдрийн айлчлалын өмнө олон нийтэд мэдэгдээгүй байжээ.

"Ази, Номхон далайн эдийн засгийн хамтын ажиллагааны дээд хэмжээний уулзалтын үеэр Ли хэлэхдээ, бөмбөр тоглох нь миний мөрөөдөл гэж байсан тул гэнэтийн бэлэг барилаа" гэж Такаичи X нийгмийн сүлжээнд бичжээ. Тэд өнгөрсөн оны 10 дугаар сарын сүүлчээр Өмнөд Солонгост болсон Ази, Номхон далайн эдийн засгийн хамтын ажиллагааны дээд хэмжээний уулзалтын үеэр анх удаа хэлэлцээ хийсэн юм.

Такаичи их сургуулийн оюутан байхдаа хүнд рок хамтлагт бөмбөр тоглодог байсан бөгөөд түүний дуртай дуунуудын нэг нь Их Британийн "Deep Purple" хамтлагийн "Burn" юм.

Японы Ерөнхий сайд, БНСУ-ын Ерөнхийлөгч нар мягмар гарагт уулзах үеэрээ хоёр орны эдийн засгийн хамтын ажиллагааг эрчимжүүлэхээр тохиролцжээ.

Эх сурвалж: Kyodo