Гренландын асуудлаар Дани, Европын Холбоо болон АНУ-ын хооронд зуучлагчийн үүрэг гүйцэтгэхээр төлөвлөж байна гэж Польшийн Батлан хамгаалахын сайд Владислав Косиняк-Камыш TVN24 телевизийн нэвтрүүлэгт оролцохдоо мэдэгджээ.
“Манай улс Европын Холбоо, Дани болон АНУ-ын хооронд зуучлагчийн үүрэг гүйцэтгэнэ. Бид талуудыг хамтран ажиллахыг ятгана” хэмээн Косиняк-Камыш хэллээ. Тэрбээр мөн “АНУ Гренландад үйл ажиллагаа явуулах зохих ёсны орон зайтай байх ёстой гэж би үзэж байна. Гренландчуудын аюулгүй байдал ямар ч байдлаар хохирох ёсгүй” гэж онцолсон байна.
Польшийн Ерөнхийлөгч Кароль Навроцкий Их Британийн Ерөнхий сайд Кир Стармертай нэгдүгээр сарын 13-нд уулзсаныхаа дараа Гренландын асуудлыг Дани болон АНУ-ын хооронд дипломат аргаар шийдвэрлэхийг дэмжиж байгаагаа мэдэгджээ.
АНУ-ын Ерөнхийлөгч Дональд Трамп Гренландыг АНУ-д нэгтгэх шаардлагатай гэж удаа дараа мэдэгдсэн юм. Тэрбээр ерөнхийлөгчийн эхний бүрэн эрхийн хугацаандаа Гренландыг худалдан авах санал дэвшүүлж байсан бол 2025 оны гуравдугаар сард тус арлыг нэгтгэх боломжтой гэдэгтээ итгэлтэй байгаагаа илэрхийлсэн юм.
Цагаан ордны Тамгын газрын даргын орлогч Стивен Миллер өмнө нь мэдэгдэхдээ, Гренландад хяналтаа тогтоох Данийн эрх эргэлзээтэй, уг арал АНУ-ын нэг хэсэг байх ёстой гэжээ.
Гренланд нь Данийн бүрэлдэхүүнд өөртөө засах эрхтэй нутаг дэвсгэрийн статустай арал юм. 1951 онд АНУ, Дани улсууд НАТО-гийн хүрээнд хүлээсэн холбоотны үүрэг амлалтын хүрээнд Гренландыг хамгаалах тухай гэрээнд гарын үсэг зуржээ. Гэрээний дагуу АНУ тус арлыг болзошгүй түрэмгийллээс хамгаалах үүргийг хүлээсэн байна.
Эх сурвалж: TASS
