Хэд хэдэн албан тушаалтнууд авлигын сүлжээний схемийг хэлэлцэж буйг харуулсан дүрс бичлэг цацагдсаны дараа Киприйн Ерөнхийлөгчийн Тамгын газрын дарга Хараламбос Хараламбус албан тушаалаасаа огцрох өргөдлөө өгчээ.

Мөн Нийгмийн дэмжлэгийн хараат бус агентлагт /AFKS/ хашдаг албан тушаалаасаа Ерөнхийлөгч Никос Христодулидисын эхнэр Филиппа Карсера халагдсан байна.

Нэгдүгээр сарын 8-нд буюу Кипр улс Европын Холбооны зөвлөлийг хагас жилийн хугацаанд даргалах болсноос хойш яг долоо хоногийн дараа Х нийгмийн сүлжээгээр дээрх дуулиант бичлэг цацагджээ.

Уг бичлэгт Хараламбусаас гадна Эрчим хүчний сайд асан Георгис Лаккотрипис, барилгын Cyfield компанийн захирал Георгис Хрисоху нар ярилцаж буй нь харагдана. Ярилцах явцад Лаккотрипис хэлэхдээ, ерөнхийлөгчийн кампанит ажилд хамгийн дээд тал нь нэг сая евро хандивлахыг хуулиар зөвшөөрсөн гэдгийг дурдаж байгаа нь сонсогдоно.

Бичлэгийг хийсэн хүмүүсийн ярьснаар, үйлчилгээ үзүүлж, хүсэлтийг нь түргэвчилсэн байдлаар шийдсэний хариуд Киприйн Ерөнхийлөгчид мөнгө дамжуулдаг схем байдаг ажээ. Түүнээс гадна, Ерөнхийлөгчийн эхнэрийн ажилладаг AFKS агентлагт мөнгө хандивласан зарим хөрөнгө оруулагчид төрийн тэргүүнтэй биечлэн уулздаг гэнэ.

зураг дээр: Ерөнхийлөгчийн Тамгын газрын дарга Хараламбос Хараламбус

Киприйн засгийн газар энэхүү бичлэгийг “эвлүүлэг хийх замаар бусдыг гутаах гэсэн хорон санаатай үйлдэл” гэж дүгнэжээ. Тус улсын тусгай албад бичлэгийн эх үүсвэрийг тогтоохын тулд АНУ, Израилаас тусламж авахаар хандсан байна. Киприйн хэвлэлүүдэд бичиж байгаагаар, яриаг нууцаар бичиж авсан хүмүүс өөрсдийгөө Нидерландын бизнесменүүд гэж танилцуулсан аж.

Харин сайд асан Лаккотрипис өөрийнх нь эсрэг гүтгэлгийг шалгуулахаар цагдаагийн газарт өргөдөл гаргасан бол Тамгын газрын дарга Хараламбус хэлэхдээ “миний бие ерөнхийлөгчийн нэр хүндийг, улс орны имижийг гутаах гэсэн санаатай оролдлогын золиос боллоо” гэж мэдэгдсэн байна. Ерөнхийлөгчийн эхнэр мөн өргөдөл гаргаж “хуурамч мэдээлэл, гүтгэлгийн бай” болсон гэдгээ дурджээ.

ЕХ-ны зөвлөлийг даргалж буй Кипрт тавдугаар сард болох парламентын сонгуулийн өмнө ийнхүү авлигын дуулиан дэгдлээ. Эвслийн засгийн газарт багтдаг улс төрийн намууд мэдэгдэл гаргаж, дуулиант хэргийг нэн даруй шалгахыг шаардсаны зэрэгцээ засгийн газрыг дэмжихээ зогсоож магадгүй гэдгээ илэрхийлжээ.

Эх сурвалж: DW