Иранд өрнөж буй эсэргүүцлийн ажиллагааг дэмжиж байгаагаа илэрхийлсэн Их Британи, Франц, Германы элчин сайд нарыг Ираны Гадаад харилцааны яам дуудан ирүүлсэн тухай өчигдөр тус улсын төрийн мэдлийн Tasnim агентлаг мэдээлжээ.  

Үүнээс өмнөхөн АНУ-ын Ерөнхийлөгч Д.Трамп хэлэхдээ “эсэргүүцлийг нухчин дарж буй Ираны эрх баригчдын эсрэг авах маш хатуу арга хэмжээний хэд хэдэн хувилбарыг хэлэлцэж байна” гэсэн юм. Ираны удирдлага эсэргүүцлийн ажиллагаанд оролцогчдыг хөнөөсөн эсэх, өөрөөр хэлбэл “улаан шугам”-ыг давсан эсэхийг Трампаас асуухад тэрбээр “тэд үүнийг үйлдэж эхэлж байх шиг байна” гэлээ.

Үүний сацуу эсэргүүцлийн жагсаалыг нухчин дарж байгаагийн хариуд Европын зарим барилга байгууламжид нэвтрэхийг Ираны дипломатчдад хориглосон тухай Европын парламентын дарга Роберта Метсола мэдэгдлээ. Тодруулбал, Брюссель, Страсбург, Люксембург дахь Европын парламентын байруудад нэвтрэх Ираны бүх иргэдийг тусгай хяналт шалгалтаар оруулна. Ялангуяа Ираны эрх баригч дэглэмийг дэмжин ажилладаг хүмүүсийг огт нэвтрүүлэхгүй ажээ.

“Ираны ард түмэн цаашид манай парламентын дэмжлэг, эв санааны нэгдэлд найдаж болно” гэж Метсолагаас парламентын гишүүдэд илгээсэн захидалд дурдсан байна.

Өнгөрсөн оны сүүлчээр дэгдсэн эсэргүүцлийн ажиллагаа өнөөдөр Ираны 25 мужийн 60 гаруй хот, тэдгээрийн дотор Техран, Малекшахи, Керманшах, Лордеган зэрэг хотуудыг хамарчээ. Интернэтийн сүлжээ тасарсан тул болж буй үйл явдлын талаарх бодитой мэдээлэл ховор байна.  

Хүний эрхийг хамгаалагчдын мэдээлснээр, эсэргүүцлийн жагсаал цуглааны явцад 600 гаруй хүн амиа алджээ. 

Эх сурвалж: DW