Холливудын Гадаадын хэвлэлийн холбооноос зохион байгуулдаг “Алтан бөмбөрцөг” шагнал гардуулах 83 дахь удаагийн ёслол Лос-Анжелес хотноо боллоо.
Хлои Жаогийн найруулсан “Hamnet” кино “Шилдэг драм кино” төрөлд “Алтан бөмбөрцөг” хүртлээ. Уг шагналд “Frankenstein”, “It Was Just an Accident”, “O Agente Secret”, “Sentimental Value”, “Sinners” зэрэг бүтээлүүд нэр дэвшсэн байна.
Мэгги О’Фарреллийн ижил нэртэй романаас сэдэвлэн бүтээсэн энэхүү кинонд Уильям Шекспирийн бага насандаа нас барсан хүү Хамнетын амьдралын зохиомол түүхийг өгүүлдэг.
“Шилдэг кино” (мюзикл эсвэл инээдмийн) төрөлд "One Battle After Another" кино шалгарчээ.
Харин Вагнер Моура "O Agente Secreto" кинонд бүтээсэн дүрээрээ драм киноны гол дүрийн шилдэг эрэгтэй жүжигчин шагнал хүртсэн байна. Уг кино мөн “Гадаад хэлээрх шилдэг кино” төрөлд шалгарчээ. Энэхүү шагналд "It Was Just an Accident", "No Other Choice", "Sentimental value", "Sirat", "The Voice of Hind Rajab" кинонууд өрсөлдсөн байна. 
Жесси Бакли “Hamnet” кинонд Уильям Шекспирийн гэргий Агнесийн дүрээрээ драм киноны шилдэг эмэгтэй жүжигчин шагналыг хүртлээ.
“Бид магадгүй хамгийн алдартай британи хүний түүхийг өгүүлсэн. Манай багт хятад найруулагч, олон ирланд уран бүтээлчид, зураг авалтын багт голдуу польшууд, мөн британи хамт олон багтсан нь үнэхээр онцгой байлаа" хэмээн тэрбээр шагналыг гардаж авсныхаа дараа хэлээд уг төрөлд нэр дэвшсэн бусад эмэгтэй жүжигчин, тэр дундаа Жулия Робертсийг биширч байгаагаа илэрхийлжээ.
Найруулагч Пол Томас Андерсон "One Battle After Another" киногоороо "Шилдэг найруулагч", "Шилдэг кино зохиол" шагналыг хүртжээ. Түүнээс гадна, Райан Куглер /Sinners/, Гильермо дель Торо /Frankenstein/, Жафар Панахи /It Was Just an Accident/, Йоахим Триер /"Sentimental value/, Хлои Жао /Hamnet/ зэрэг найруулагчид энэхүү шагналд нэр дэвшсэн байна.
Шилдэг богино хэмжээний цувралаар "Adolescence" кино шалгарсан байна. Уг цувралд тоглосон Британийн 16 настай жүжигчин Оуэн Купер “телевизийн цувралын туслах дүрийн шилдэг эрэгтэй жүжигчин” шагнал хүртжээ.
Шилдэг анимэйшн киногоор "KPop Demon Hunters" тодорлоо. "Arco", "Demon Slayer: The Infinite Castle of Kimetsu Yaiba", "Elio", "Little Amйlie or the Character of Rain", "Zootopia 2" кинонууд уг шагналд нэр дэвшсэн байна.
“Алтан бөмбөрцөг” нь Холливудын Гадаадын хэвлэлийн холбооноос 1944 оноос хойш олгож буй Америкийн кино, телевизийн салбарын нэр хүндтэй шагнал юм. Уг шагналын эздийг жил бүрийн нэгдүгээр сард олон улсын 90 орчим сэтгүүлчийн санал хураалтаар тодруулдаг.
Эх сурвалж: ABC News
