Куба улс “оройтоогүй дээрээ” АНУ-тай хэлэлцээр байгуулах хэрэгтэй гэж АНУ-ын Ерөнхийлөгч Дональд Трамп ням гарагт "Truth Social" сошиал хуудсандаа мэдэгджээ.

Түүний хэлснээр “олон жилийн турш Куба улс Венесуэлээс нийлүүлдэг их хэмжээний нефть, санхүүгийн дэмжлэгээр амьдарч ирсэн” бөгөөд үүний хариуд 1999-2013 онд Венесуэлийн ерөнхийлөгчөөр ажиллаж байсан Уго Чавес, мөн нэгдүгээр сарын 3-нд АНУ-ын армийн тусгай хүчнийхний баривчилсан Венесуэлийн удирдагч Николас Мадурод “аюулгүй байдлыг хангах үйлчилгээ” үзүүлж ирсэн гэжээ. Гэвч одоо нөхцөл байдал өөрчлөгдөнө гэж Трамп бичсэн байна. “Цаашид Кубад нефть ч, мөнгө ч ирэхгүй. Би Кубын эрх баригчдад хандаж хэлэхэд оройтохоосоо өмнө АНУ-тай хэлэлцээр байгуулахыг зөвлөж байна” хэмээн тэрбээр анхааруулсан байна. Гэхдээ АНУ-ын Ерөнхийлөгч яг ямар хэлэлцээрийг хэлж байгаагаа, мөн Куба улс ямар үр дагавартай тулгарах талаар  тодорхой дурдсангүй.

Кубын эрх баригчид Трампын мэдэгдэлд эрс дургүйцэж байгаагаа илэрхийлжээ. “Куба улс аюулгүй байдлыг хангах үйлчилгээ үзүүлснийхээ төлөө аль нэг улсаас мөнгөн эсвэл материаллаг хэлбэрээр ямар нэгэн төлбөр авдаггүй, хэзээ ч авч байгаагүй” хэмээн Кубын Гадаад хэргийн сайд Бруно Родригес ням гарагт X нийгмийн сүлжээний хуудсандаа онцлон тэмдэглэжээ.

“АНУ-аас ялгаатай нь гэвэл, манай улс бусад улс оронд хөлсний цэрэг ашиглах, дарамт шахалт үзүүлэх, эсвэл цэргийн хүчээр сүрдүүлэх үйл ажиллагаа явуулдаггүй” гэж нийтлэлд дурджээ. “Куба улс бусад аливаа улсын нэгэн адилаар зах зээлээс шатахуун, түлш импортлох бүрэн эрхтэй. Мөн АНУ-ын нэг талын албадлагын арга хэмжээнд захирагдахгүйгээр, хөндлөнгийн оролцоогүйгээр худалдаа, эдийн засгийн харилцаагаа хөгжүүлэх бүрэн эрхтэй” гэж сайд онцолсон байна.

“АНУ их гүрний дээрэнгүй үзлээр дураараа авирлаж, Куба болон дэлхийн энэ тал бөмбөрцөгт төдийгүй даян дэлхийн энх тайван, аюулгүй байдалд заналхийлж байна” гэж Кубын Гадаад хэргийн сайд мэдэгдлээ. 

Эх сурвалж: Kazinform