Венесуэлийн сөрөг хүчний удирдагч Мария Корина Мачадо Нобелийн Энх тайвны шагналаа АНУ-ын Ерөнхийлөгч Дональд Трампад шилжүүлэн өгч магадгүй гэх мэдээллийг уг шагналыг олгодог байгууллага болох Норвегийн Нобелийн хүрээлэн няцаажээ. 

“Норвегийн Нобелийн хороо болон Норвегийн Нобелийн хүрээлэн Энх тайвны шагналын статусын тогтвортой байдлын талаар тайлбар хийнэ үү гэсэн олон хүсэлтийг хүлээн авч байна. Нобелийн шагналыг олгосноос хойш уг шагналыг цуцлах, хуваах, эсвэл бусдад шилжүүлэх боломжгүй. Шагналыг олгох шийдвэр нь эцсийнх байдаг бөгөөд мөнхөд хүчин төгөлдөр үлддэг” гэж тус хүрээлэнгийн мэдэгдэлд онцолсон байна.

Өмнө нь Мачадо шагналаа Венесуэлийн удирдагч Николас Мадурог баривчлах ажиллагааг удирдан явуулсан АНУ-ын Ерөнхийлөгч Дональд Трампад шилжүүлэх эсвэл АНУ-ын Ерөнхийлөгчтэй хуваалцахыг хүсэж байгаагаа мэдэгдсэн юм. 

“Мэдээж би өөрийн биеэр түүнд хэлмээр байна. Учир нь энэ шагнал бол Венесуэлийн ард түмнийх, бид үнэхээр түүнд шагналыг өгөхийг, түүнтэй хуваалцахыг хүсэж байна” гэж Мачадо нэгдүгээр сарын 5-нд Fox News телевизийн хөтлөгч Шон Хэннитид ярьжээ. “Түүний (Трамп) хийсэн зүйл бол түүхэн үйл явдал. Энэ бол ардчилсан өөрчлөлтөд хийсэн асар том алхам” гэж тэрбээр дүгнэн хэлсэн байна.

Шагнал олгосныг зарласнаас хойш Мачадо уг шагналыг Трампад болон Венесуэлийн ард түмэнд зориулж байгаагаа мэдэгдэж  байсан юм.

Мачадо дээрх мэдэгдлийг Трамп өөрийг нь Венесуэлийн түр Ерөнхийлөгчөөр томилох явдлыг шууд үгүйсгэсний дараа хийжээ. The Washington Post сонинд бичсэнээр, энэ нь Мачадо Трампад Нобелийн Энх тайвны шагналыг өгөөгүйтэй холбоотой байжээ. “Хэрвээ тэрбээр татгалзаж, би энэ шагналыг авах эрхгүй, учир нь энэ шагнал бол Трампынх" гэж хэлсэн бол өнөөдөр тэрбээр Венесуэлийн Ерөнхийлөгч байх байлаа” гэж нэрээ нууцалсан эх сурвалж ярьсан байна.

Одоогоор Цагаан ордны тэргүүн Венесуэлийн түр Ерөнхийлөгчөөр Мадурогийн үед дэд Ерөнхийлөгчөөр ажиллаж байсан Делси Родригезийг дэмжиж байгаа гэж AP агентлаг мэдээлжээ.