Хятад, Орос, Иран улсууд Өмнөд Африкийн Бүгд Найрамдах Улсын /ӨАБНУ/ тэнгисийн орон зайд долоо хоног үргэлжлэх тэнгисийн цэргийн хамтарсан сургуулилт эхэллээ.  

Уг сургуулилалтыг “усан тээврийн аюулгүй байдал болон далайн эдийн засгийн үйл ажиллагааг хамгаалах зорилготой “БРИКС+” ажиллагаа" хэмээн ӨАБНУ мэдэгдсэн байна. 

“БРИКС +” бол анх Бразил, Орос, Энэтхэг, Хятад, Өмнөд Африкийг багтааж байсан геополитикийн эвслийн өргөтгөсөн хэлбэр бөгөөд тус эвсэлд оролцогч орнууд үүнийг АНУ болон Барууны эдийн засгийн ноёрхлыг сөрж буй хүч гэж үздэг. Одоогоор тус бүлэгт зургаан улс нэмэгдэн ороод байна.

Хэдийгээр ӨАБНУ нь Хятад, Оростой тэнгисийн цэргийн хамтарсан сургуулилалтыг тогтмол зохион байгуулдаг боловч энэ удаагийн сургуулилалт АНУ-ын Ерөнхийлөгч Дональд Трампын засаг захиргаа болон Хятад, Иран, Өмнөд Африк, Бразил зэрэг “БРИКС+”-ийн хэд хэдэн улс хооронд харилцаа таагүй байгаа үед болж байна. 

БРИКС-ийн өргөтгөсөн хувилбарт одоо Египет, Индонез, Саудын Араб, Этиоп, Арабын Нэгдсэн Эмирт Улс багтаж байна.

Сургуулилалтыг нээх ёслолыг Хятадын зэвсэгт хүчний төлөөлөгчид удирдан явуулсан бөгөөд Бразил, Египет, Этиоп улсууд ажиглагчаар оролцож байгаа ажээ.

“WILL FOR PEACE 2026 сургуулилалтад БРИКС+ орнуудын тэнгисийн цэргийн хүчин оролцож, далай тэнгис дэх аюулгүй байдлыг хангах хамтарсан ажиллагаа явуулж, харилцан уялдаа холбоотой ажиллах чадвараа сайжруулж байна” гэж Өмнөд Африкийн армийн мэдэгдэлд дурдсан байна. 

АНУ-ын Ерөнхийлөгч Дональд Трамп БРИКС-ийн орнуудыг “АНУ-ын эсрэг бодлого” явуулж байна хэмээн буруутгаж, өнгөрсөн оны нэгдүгээр сард тус эвсэлд багтдаг бүх оронд 10 хувийн худалдааны татвар нэмж ногдуулна гэж сүрдүүлж байсан юм.

Өмнөд Африкийн Ерөнхийлөгч Сирил Рамафосагийн эвслийн хоёр дахь том нам болох, Барууныг дэмжигч Ардчилсан холбоо уг сургуулилалтыг “төвийг сахисан бодлогод" харшилж байна” хэмээн мэдэгдээд, БРИКС нь “Өмнөд Африкийг геополитикийн тоглоомд оролцогч гадуурхагдсан улсуудын хөзөр болгосон” гэж шүүмжилжээ.

Харин Матебула энэ шүүмжлэлийг няцааж, “Энэ бол улс төрийн хэлэлцээр биш, АНУ-ын эсрэг чиглэсэн ямар ч дайсагнал байхгүй. Өмнөд Африк АНУ-ын тэнгисийн цэргийн хүчинтэй ч мөн адил тогтмол сургуулилт хийдэг” гэж мэдэгдсэн байна.

“Энэ бол тэнгисийн цэргийн сургуулилалт. Бидний зорилго бол чадавхаа сайжруулах, мэдээлэл солилцох явдал” хэмээн тэрбээр онцолжээ.

Reuters