Google-ийн толгой компани болох Alphabet-ийн зах зээлийн үнэлгээ 3.88 их наяд ам.долларт хүрснээр сүүлийн долоон жилийн хугацаанд анх удаа "Apple"-аас давлаа. Үнэлгээ ийнхүү өссөн нь Google компани хиймэл оюуны технологид ихээхэн хөрөнгө оруулж байгаа, мөн Apple-ын хувьцааны үнэ буурсантай холбоотой.
Нэгдүгээр сарын 7-ны өдрийн арилжааны дүнгээр Google компанийн зах зээлийн үнэлгээ ойролцоогоор 3.88 их наяд ам.доллар, харин Apple-ийнх 3.84 их наяд ам.доллар болсон байна.
Нэг өдрийн дотор Google-ийн хувьцааны үнэ 2-оос дээш хувиар өссөн бол Apple-ийн хувьцаа сүүлийн таван хоногт 4-өөс дээш хувиар буурсан байна. Шинжээчид энэ өөрчлөлтийг Google хиймэл оюун ухааны салбарт эрчимтэй хөрөнгө оруулж байгаа, харин Apple хоцорч буйтай холбон тайлбарлажээ.
2025 онд Google АНУ-ын хөрөнгийн зах зээл дээрх хамгийн амжилттай компаниудын нэг болсон байна. Тухайлбал, тус компани хиймэл оюунд зориулсан Ironwood нэртэй шинэ чипээ танилцуулж, мөн хиймэл оюуны шинэ "Gemini 3" загвараа гаргажээ. Өнгөрсөн онд Google-ийн хувьцаа 65 хувиар өссөн нь 2009 оноос хойших хамгийн өндөр үзүүлэлт болсон байна.
Үүлэн технологийн бизнес гэдэг нь компаниуд өөрийн гэсэн үнэтэй тоног төхөөрөмж худалдан авахын оронд интернэтээр дамжуулан сервер, программ хангамж, өгөгдөл хадгалах нөөцийг ашиглахыг хэлнэ. Энэ нь компаниудад уян хатан ажиллах, зөвхөн ашигласан нөөцдөө төлбөр төлөх, хэрэгцээндээ тохируулан тэлэх боломж олгодог. 2025 оны эхний есөн сарын хугацаанд Google компани үүлэн салбарт 1 тэрбум гаруй ам.долларын үнийн дүнтэй томоохон гэрээнүүд байгуулсан нь өмнөх хоёр жилийнхийг нийлүүлснээс ч өндөр үзүүлэлт юм.
Харин Apple компани 2022 оны сүүлчээр ChatGPT гарснаас хойш эхэлсэн хиймэл оюун ухааны өрсөлдөөнд бараг оролцоогүй хэвээр байна. Тус компани хиймэл оюунд суурилсан Siri-ийн шинэ хувилбарыг 2025 онд танилцуулахаар төлөвлөж байсан ч 2026 онд болгон хойшлуулжээ.
Эх сурвалж: UNN
