Өнгөрсөн 2025 онд Туркийн нисэх онгоцны буудлууд 247,2 сая зорчигчид үйлчилсэн нь тус улсын хувьд түүхэн дээд үзүүлэлт боллоо.

Дотоодын болон олон улсын нислэгүүдийн аль алиных нь тоо нэмэгдэж, 2024 онтой харьцуулахад 7 хувиар өссөн байна. Ялангуяа өнгөрсөн 12 дугаар сард зорчигч урсгал 17,5 саяас давж, нийт агаарын тээврийн хөдөлгөөний эрчим жилийн дүнгээр 11 хувиар нэмэгджээ. Тодруулбал, дотоодын нислэгээр 101 сая гаруй хүнд, гадаадын нислэгээр 145 сая орчим хүнд үйлчилсэн байна. Үүнтэй зэрэгцэн ачаа тээврийн хэмжээ ч нэмэгдэж, Туркийн нисэх буудлуудаар дамжуулан 5 сая гаруй тонн ачаа тээвэрлэжээ.

Өнгөрсөн онд гол ачааллыг Истанбулын нисэх онгоцны буудал үүрч, 84,5 сая зорчигчид үйлчилсэн бол "Сабиха Гёкчен" буудлаар 48 сая хүн дамжин өнгөрсөн байна. Амралт сувиллын бүс нутгийн нисэх онгоцны буудлуудаар 63 сая хүн үйлчлүүлснээс 39 сая нь Анталья хотын нисэх буудлаар дамжжээ.

Ташрамд дурдахад, Туркийн нийслэл Анкара хот дахь цэргийн нисэх хүчний Этимесгут баазыг шинэчлэх ажил явагдаж байгаа бөгөөд тус буудал энэ оны 7 дугаар сард явагдах НАТО-гийн дээд хэмжээний уулзалтын үеэр хүлээлгийн ВИП танхим болох юм.

Эх сурвалж: Kazinform