Энхийн гэрээ байгуулагдсан тохиолдолд Их Британи, Франц улсууд энхийг сахиулах нэгдсэн хүчний бүрэлдэхүүнд 15 мянган цэргийг Украинд илгээнэ гэж The Times сонинд бичжээ.

Харин энэ тоо өмнө нь төлөвлөж байснаас илт цөөн бөгөөд эхний хувилбараар Францын цэргүүд дээр Их Британийн 10 мянган цэрэг нэмэгдэх ёстой байв. Гэтэл Их Британийн байнгын армид сургагдаж бэлтгэгдсэн ердөө 71 мянган цэрэг байгаа юм. Тэгэхээр одоо Британи, Францаас тус бүр 7500 цэргийг илгээхээр шийдвэрлэж байгаа бололтой. Гэсэн хэдий ч ийм тооны цэргийг дайчилна гэдэг бол мөн л амаргүй зорилт юм.

Францын Ерөнхийлөгч Э.Макрон телевизийн France 2 сувагт ярилцлага өгөхдөө “энэхүү цэргийн хүч нь байлдааны ажиллагаанд оролцохгүй бөгөөд фронтын шугамаас хол буюу баруун Украинд байрлана” гэлээ. Үүний сацуу Герман улс Украины ойролцоо буюу Польш эсвэл Румыний нутагт цэргээ байрлуулахад бэлэн байгаа ажээ.

Сануулан дурдахад, энэ сарын 6-ны өдөр “Украинд туслах хүсэлтэй улсуудын эвсэл”-д багтдаг орнууд Украинд аюулгүй байдлын баталгаа олгох тухай тунхаглалд гарын үсэг зурсан билээ. Үүний дараа Украин, Франц, Их Британи улсууд хэтийн зорилтын тухай өөр нэгэн тунхагийг баталсан бөгөөд энэ нь Их Британийн Ерөнхий сайд К.Стармерын хэлснээр, гал зогсоосны дараа Британи, Францын болон бусад түнш улсуудын цэргийг Украинд байрлуулах эрхзүйн үндсийг тавих ажээ. Тэрбээр мөн мэдэгдэхдээ, Их Британи, Франц хоёр гал зогсоох дэглэм тогтоосны дараа Украин даяар “цэргийн төвүүдийг” байгуулах бөгөөд зэвсэг техник хадгалах зориулалттай хамгаалагдсан объектуудыг барьж эхэлнэ гэлээ.

The Times: Европын орнууд 64 мянган хүнтэй цэргийн хүчийг бүрдүүлж чадахгүй

Их Британийн армийн Жанжин штабын дарга асан, адмирал Тони Радакин өнгөрсөн оны хавар Европын ижил зиндааны албан тушаалтнуудад хандан, энхийн гэрээ байгуулагдсан тохиолдолд 64 мянган хүнтэй цэргийн хүчийг Украинд илгээхэд бэлэн байгаа эсэхийг нь лавлажээ. Үүний хариуд Европын орнуудын батлан хамгаалахын сайд нар мэдэгдэхдээ “ийм хэмжээний хүчийг дайчлах ямар ч боломжгүй, тэр ч байтугай 25 мянган цэрэг бол хамгийн дээд боломж” гэжээ.

Литва улсын Батлан хамгаалахын сайд Довиле Шакалене хэлэхдээ “Орос 800 мянган цэрэгтэй, хэрвээ бид 64 мянган цэрэг гаргаж чадахгүй бол энэ нь бидний сул талыг харуулж байна” гэлээ. The Times сонины эх сурвалжийн ярьснаар, НАТО-гийн зүүн жигүүрийн улсууд Украинд цэргээ илгээхээс болгоомжилж буйн учир нь гэвэл, цэрэг илгээх нь хилийн хамгаалалтыг сулруулах ажээ. Украинд цэргээ илгээсэн үед Оросын цэрэг довтлох вий хэмээн Литва улс болгоомжилж байна.

Эх сурвалж: DW