Йемений өмнөд нутгийн салан тусгаарлагчдын удирдагч Айдарус аз-Зубайди хөлөг онгоцоор Сомалиландад очиж, тэндээсээ Сомалийн Могадишу хот руу нисэх онгоцоор явсан гэж Саудын Араб тэргүүтэй Арабын орнуудын эвсэл мэдэгджээ.

Сомалиландээс Могадишу руу Зубайдиг аваачсан нисэх онгоц "АНЭУ-ын офицеруудын хяналтад" нэг цаг хүлээсний дараа Абу Дабигийн цэргийн нисэх онгоцны буудал руу ниссэн гэж тус эвслээс пүрэв гаргийн өглөө гаргасан мэдэгдэлд дурджээ. Зубайди уг онгоцонд байгаа эсэхийг мэдэгдэлд дурдаагүй байна.

Өмнөдийн шилжилтийн зөвлөлийн удирдагч Айдарус Зубайди хэлэлцээ хийхээр Эр-Рияд руу явах нисэх онгоцонд суугаагүй, түүний хувь заяа тодорхойгүй байгаа нь өнгөрсөн сард эхэлсэн цэргийн хурцадмал байдлыг намжаах хүчин чармайлтуудад хүндрэл учруулж байгаа тухай Арабуудын орнуудын эвсэл мэдэгдсэнээс нэг өдрийн дараа дээрх мэдэгдэл гарсан байна.

Йемений өмнөд нутагт дэгдсэн хямрал Персийн булангийн газрын тосоор баян хоёр хүчирхэг улс болох Саудын Араб, АНЭУ-ын хооронд маргаан үүсгэж, Иранаас дэмжлэг авдаг хуситуудын бүлэглэлтэй тэмцэж буй олон улсад хүлээн зөвшөөрөгдсөн Йемений засгийн газарт дэмжлэг үзүүлж буй эвслийг хагалан бутаргасан юм.

Тус хоёр улс анх 2014 онд хуситууд Йемений нийслэл Сана хотыг эзлэн авсны дараа Йемений хэрэгт хөндлөнгөөс оролцож эхэлсэн юм.

АНЭУ дараа жил нь буюу 2015 онд Саудын Араб тэргүүтэй эвсэлд нэгдэж, олон улсын хүлээн зөвшөөрөгдсөн засгийн газрыг дэмжиж эхэлжээ.

Өмнөд шилжилтийн зөвлөлийг 2017 онд АНЭУ-ын дэмжлэгтэйгээр байгуулсан бөгөөд хожим нь засгийн газрын эвсэлд орсноор Йемений өмнөд ба зүүн нутгийг хянах болсон байна. Өнгөрсөн сард тус зөвлөлийн цэргийн хүч томоохон газар нутгийг эзэлж, эрх мэдлийн тэнцвэрийг өөрчилснөөр Саудын Араб ба АНЭУ-ын хооронд маргаан дэгдсэн байна.

Эх сурвалж: Reuters