108 тэрбум ам.доллароор худалдан авах "Paramount Skydance" компанийн шинэ саналыг хүлээж авахгүй байхыг "Warner Bros. Discovery" компанийн захирлуудын зөвлөл хувьцаа эзэмшигчдэд хандан лхагва гарагт зөвлөжээ. Захирлуудын зөвлөл "Warner Bros."-ыг "Netflix"-тэй нэгтгэх нь илүү ашигтай, эрсдэл багатай гэж үзэж байгаа аж.

"Paramount"-ын сүүлд тавьсан санал хэд хэдэн гол заалтаараа Netflix-тэй байгуулсан нэгдэх гэрээнээс дутуу хэвээр байгааг бид олж харсан" гэж захирлуудын зөвлөлийн дарга Сэмюэл Ди Пьяцца мэдэгджээ.

Тэрбээр Paramount-ын санал нь одоо ч хангалттай ашигтай биш байгааг онцлон тэмдэглээд, үүнд хэд хэдэн эрсдэл байгаа гэжээ. Тухайлбал, маш их хэмжээний зээлээр санхүүжүүлэхээс гадна хэрэв хэлцлийг эцэслэж чадахгүй тохиолдолд "Warner Bros. Discovery"-гийн хувьцаа эзэмшигчдийг хамгаалах механизм байхгүй байгаа аж.

“Netflix-тэй байгуулсан гэрээ нь илүү их ашиг өгч, илүү тодорхой бөгөөд томоохон эрсдэл үүсгэхгүй, их зардал гаргахгүй” гэж Ди Пьяцца онцлон хэлсэн байна.

Өнгөрсөн оны 12 дугаар сарын дундуур "Warner Bros. Discovery"-гийн захирлуудын зөвлөл "Paramount"-ын саналаас татгалзаж, Netflix-тай нэгтгэхийг хувьцаа эзэмшигчдэд зөвлөж байсан юм. Гэсэн хэдий ч тус компанийг худалдан авахаар төлөвлөж байгаа гэдгээ "Paramount" мэдэгджээ.

Paramount компанийн гүйцэтгэх захирал Дэвид Эллисоны эцэг, Oracle компанийг хамтран үүсгэн байгуулагч Ларри Эллисон Warner Bros.-ийг худалдан авах саналыг хувьцааны санхүүжилтийн хүрээнд 40.4 тэрбум ам.долларын буцаан татах нөхцөлгүй хувийн баталгаа гаргахыг 12 дугаар сарын 22-нд зөвшөөрчээ.

"Warner Bros." компани кино, телевизийн студи болон HBO Max стриминг үйлчилгээгээ Netflix-д худалдах хэлэлцээ хийж эхэлсэн тухай хэвлэлүүд өнгөрсөн 12 дугаар сард мэдээлж байсан юм.

Уг мэдээлэл гарсны дараа Netflix компани Warner Bros.-ийн бүх хөрөнгийг 27.75 ам.доллароор буюу нэг хувьцааг 72 тэрбум ам.доллароор худалдан авах гэрээ байгуулснаа мэдэгдсэн бөгөөд компанийн нийт үнэлгээ 82.7 тэрбум доллар болсон байна.

Харин дараа нь "Paramount Skydance" компани илүү ашигтай нөхцөлөөр, 108 тэрбум ам.доллароор компанийг худалдан авахад бэлэн байгаагаа илэрхийлжээ.

Эх сурвалж: RIA Novosti