АНУ-ын хамгийн аюултай тагнуулчдын нэг гэгддэг Олдрич Эймс Мэрилэнд муж улсын Камберленд хот дахь хорих ангид нас баржээ.
CBS телевизээр мэдээлснээр, тэрбээр 84 настай байсан байна. АНУ-ын Тагнуулын төв газрын сөрөх тагнуулын офицер асан Эймс 1994 оны дөрөвдүгээр сарын 28-наас хойш тагнуулын хэрэгт буруутгагдан, хугацаанаас өмнө суллагдах эрхгүйгээр бүх насаараа хоригдож байсан юм. Тэрбээр Зөвлөлт Холбоот Улсад, хожим нь ОХУ-д нууц мэдээлэл дамжуулж байжээ.
Эймс 100 гаруй нууц ажиллагааг илчилж, Барууны талд ажиллаж байсан 30 гаруй тагнуулчийн нэрийг задруулсны улмаас ТТГ-ын 10 ажилтан амиа алдсан байна.
Есөн жилийн турш КГБ-д “Колокол” гэх нууц нэрээр хоёр талд ажиллаж байсан Эймс ЗХУ-д ажиллаж байсан ТТГ-ын бараг бүх тагнуулчийг илчилжээ. Тэдний заримд нь ЗХУ-д ялын дээд хэмжээ буюу буудан хороох шийтгэл хүртэл оноосон байна.
1985 оны дөрөвдүгээр сард Зөвлөлтийн талд тагнуулчдыг барьж өгснийхөө хариуд тэрбээр 50 мянган ам.доллар авсан бөгөөд Зөвлөлт болон Оросын тусгай албадтай хамтран ажилласан есөн жилийн хугацаанд нийтдээ 2.5 сая орчим ам.долларын хөлс авчээ.
1983 онд Эймс дахин АНУ-д ирж, ЗХУ-ын нутаг дэвсгэрт явуулж буй ажиллагааг хариуцсан ТТГ-ын нэгжийн даргаар томилогдсон бөгөөд асар их хэмжээний нууц мэдээлэлд нэвтрэх болсон байна.
Түүнийг 1994 оны хоёрдугаар сарын 21-нд баривчлахаас ТТГ “дотоод дахь урвагч"-ийг илрүүлэх ажиллагааг аль хэдийн нэг жилийн турш идэвхтэй явуулаад байжээ.
Эймс гэм буруугаа хүлээж, мөрдөн шалгах ажиллагаанд хамтран ажилласан байна.
Эх сурвалж: CBS
