Хятадын эрх баригчид хиймэл оюуныг сэтгэл хөдлөлгүй, аюулгүй мэдээллийн хэрэгсэл болгохыг эрмэлзэж байна.
Тодруулбал, Хятадад хиймэл оюуныг хөгжүүлэх үйл явцын үндсэн хэсэгт тавигдах стандартыг тогтоох журмын төслийг боловсруулжээ. Уг журам нь хиймэл оюуны технологийг хориглох бус харин хиймэл оюуны “сэтгэл хөдлөл”-ийг хянахтай холбоотой юм. Өөрийгөө хүн мэтээр илэрхийлдэг, хүний дүрд “тоглодог” чат-бот зэрэг "хүнтэй төстэй" хиймэл оюуны үйлчилгээг зохицуулах тухай дэлхийд анхных болох уг журмыг олон нийтээр хэлэлцүүлж байгаа бөгөөд хэлэлцүүлэг нэгдүгээр сарын 25 хүртэл үргэлжилнэ.
Кибер орон зайн удирдлагын газраас гаргасан баримт бичигт дурдсанаар, энэхүү журам нь “сэтгэл хөдлөлийн сөрөг нөлөөллөөс урьдчилан сэргийлэх зорилготой” ажээ. Өөрөөр хэлбэл, хэт үнэмшилтэй, манипуляц хийж болзошгүй виртуал ярилцагч нь иргэдийн сэтгэл зүйд хохирол учруулахаас сэргийлнэ гэсэн үг.
Өмнөх зохицуулалтууд хиймэл оюун юу хэлж байгааг хянадаг байсан бол, шинэ журам нь яаж хэлж байгааг нь хянахад чиглэжээ.“Энэ бол контентын аюулгүй байдлаас сэтгэл зүйн аюулгүй байдал руу шилжиж буй алхам мөн” хэмээн Нью-Йоркийн их сургуулийн хууль зүйн профессор Уинстон Ма тайлбарлав.
Эх сурвалж: RT
