Энэ онд өвлийн Олимпын наадам, хөл бөмбөгийн ДАШТ, АНУ байгуулагдсаны 250 жилийн ой зэрэг олон чухал үйл явдлууд тохионо. Ингээд зарим чухал үйл явдлуудыг CNBC суваг тоймлосныг хүргэж байна.

Милан-Кортинагийн өвлийн Олимпын наадам

Өвлийн Олимпын XXV наадам Италийн Милан болон Кортине-д’Ампеццо хотуудад хоёрдугаар сарын 6-нд эхэлж, өвлийн спортын олон улсын одод хурд, хүчээ сорино. 

Нээлтийн ёслол Милан хотын “Сан-Сиро” хөл бөмбөгийн цэнгэлдэхэд болох бөгөөд “TODAY” шоуны хөтлөгч Саванна Гатри, NBC Sports сувгийн хөтлөгч Терри Гэннон нар хөтлөх бол Америкийн дуучин Мэрайя Кэри, Италийн дуучин Пьерфранческо Фавино үзүүлбэрээ толилуулна. 

Хаалтын ёслол 2 дугаар сарын 22-нд болно. 

Паралимпын наадам мөн Милан, Кортине-д’Ампеццо хотод 3 дугаар сарын 6-14-ний хооронд болох бөгөөд Паралимпын тамирчид уулын цана, биатлон, цанын марафон, хоккей, сноуборд, мөн керлинг гэсэн зургаан төрлөөр өрсөлдөнө. 

Artemis II хөтөлбөрийг хэрэгжүүлнэ

Энэ онд АНУ-ын Агаарын нислэг, сансрын уудмыг шинжлэн судлах төв /NASA/ Сар руу сансрын нисгэгч илгээх хөтөлбөрөө хэрэгжүүлнэ. Тодруулбал, Саран дээр сансрын нисгэгчдийг буулгах “Artemis II” хөтөлбөрийг хоёрдугаар сараас дөрөвдүгээр сарын хооронд хэрэгжүүлэх төлөвтэй байна. Энэхүү нислэгийн үеэр NASA-гийн 3Space Launch System3 зөөгч пуужин болон Orion сансрын хөлгийг  туршина. Хөтөлбөрийн хүрээнд дөрвөн сансрын нисгэгч 10 орчим хоногийн турш Сарыг тойрон нисэх бөгөөд энэ үеэр Orion хөлгийн систем, тоног төхөөрөмжүүд сансар огторгуйн гүнд хэрхэн ажиллахыг үнэлэх юм. 

Энэхүү нислэг нь “Artemis” хөтөлбөрийн хүрээнд хийх анхны жолоодлогот нислэг болох бөгөөд сансрын нисгэгчид тойрог замаас 9200 гаруй км-ийн хол зайд нисэх ажээ. Энэ нь 1972 онд “Аполлон-17” хөлгөөр ниссэнээс хойш хүн анх удаа Дэлхийн нам тойрог замаас цааш ниссэн нислэг болох юм.

Энэхүү нислэг амжилттай болбол сансрын нисгэгчдийг анх удаа Сарны өмнөд туйлын ойролцоо буулгах зорилготой "Artemis III" хөтөлбөрийг хэрэгжүүлэхэд бэлтгэх ажлыг эхлүүлнэ. АНУ-ын Ерөнхийлөгч Дональд Трамп саяхан зарлиг гарган “сансар дахь АНУ-ын манлайлах байр суурийг бататгах, Сарны эдийн засгийн үндэс суурийг тавих, Ангараг руу хийх аялалд бэлтгэх, Америкийн дараагийн үеийн судлаачдад урам зориг өгөх зориогоор 2028 он гэхэд сансрын нисгэгчдийг Саран дээр дахин буулгах  үүрэг даалгаврыг NASA-д өгсөн юм. 

Хөл бөмбөгийн ДАШТ

Хөл бөмбөгийн дэлхийн аварга шалгаруулах 23 дахь удаагийн тэмцээнд 48 улсын шигшээ баг өрсөлдөх бөгөөд анх удаа АНУ, Канад Мексик гэсэн гурван улс хамтран зохион байгуулна. 

Тэмцээний эхний тоглолт зургаадугаар сарын 11-нд Мехико хотын “Ацтека” цэнгэлдэх хүрээлэнд болох бол шигшээ тоглолт долоодугаар сарын 19-нд Нью -Жерси муж улсын Ист-Ратерфорд хотын “МетЛайф” цэнгэлдэх хүрээлэнд болно.

Сар гаруй хугацаанд Канадын Торонто, Ванкувер, Мексикийн Гвадалахара, Мехико, Монтеррей, АНУ-ын Атланта, Бостон, Даллас, Хьюстон, Канзас-Сити, Лос-Анжелес, Майами, Нью-Йорк-Нью-Жерси, Филадельфи, Сан-Франциско, Сиэтл хотуудад 104 тоглолт явагдана. 

Энэ жил тэмцээнд 2022 оны Катарын ДАШТ-тэй харьцуулахад 16-аар илүү олон баг оролцож байна. 

2022 оны дэлхийн аварга Аргентин (гурван удаагийн аварга), хөл бөмбөгийн домгууд Бразил (таван удаагийн аварга), Англи (1966 оны ДАШТ-ийг зохион байгуулж, аварга болсон), Герман (дөрвөн удаагийн аварга), Франц (хоёр удаагийн аварга, 2018 онд), Испани (2010 оны аварга), Уругвай (хоёр удаагийн аварга) улсуудын шигшээ багууд оролцох эрхээ аваад байна. 

Харин Кабо-Верде, Кюрасао, Иордан, Узбекистан улсуудын багууд анх удаа оролцоно. 12 дугаар сарын байдлаар Мексик, Канад, Австрали, Колумби, Эквадор, Египет, Гана, Иран, Япон, БНСУ, Марокко, Катар, Саудын Араб, ӨАБНУ зэрэг 42 баг тэмцээнд эрхээ аваад байна. ФИФА-ийн мэдээлснээр үлдсэн 6 баг гуравдугаар сард тодрох бөгөөд дөрвөн баг Европын плей-оффоор, хоёр баг ДАШТ-ий плей-оффоор шалгарна.

АНУ-ын тусгаар тогтнолын 250 жилийн ой

1776 оны долоодугаар сарын 4-нд АНУ-ын Тусгаар тогтнолын тунхаглалыг баталсны 250 жилийн ой энэ онд тохионо. Ойн өдөрт зориулсан үйл ажиллагаанууд аль хэдийн эхэлсэн бөгөөд бүтэн жилийн турш үргэлжилнэ. 

Шинэ жилийн баярын өдөр Калифорни муж улсын Пасадена хотод "Хамтдаа, 250 жилийн турш урагшлах нь" уриа бүхий Сарнайн жагсаалаар America250 хөтөлбөрийг эхлүүлжээ. Уг хөтөлбөрийг ойн хүрээнд зохион байгуулах үйл ажиллагааг төлөвлөх зорилгоор 2016 онд Конгрессоос боловсруулсан байна. 

2025 оны нэгдүгээр сард Ерөнхийлөгч Трамп ойн хүрээнд зохион байгуулах үйл ажиллагааг төлөвлөх тухай зарлиг гаргасан юм. Дараа нь тэрбээр баярын үйл ажиллагааны нэмэлт хөтөлбөрийг төлөвлөх зорилгоор Freedom 250 гэдэг санаачилгыг эхлүүлснээ зарласан юм. Уг хөтөлбөрийн үйл ажиллагаа шинэ жилийн үдшээс эхэлжээ. 

Баярын үйл ажиллагааны оргил нь Тусгаар тогтнолын өдрөөр Үндэсний талбайд болох “үндэсний нэгдсэн баяр” байх бөгөөд энэ өдөр байлдааны онгоцууд нислэгийн үзүүлбэрээ толилуулахаас гадна Трамп үг хэлж, ёслолын буудлага болно. 

Эх сурвалж: CNBC