Францын жүжигчин, дуучин, зохиолч Брижит Бардо 91 насандаа таалал төгссөн тухай дэлхийн хэвлэлүүд “Брижит Бардо сан”-гийн мэдэгдлийг эш татан ням гарагт мэдээлжээ.

“Бардо нь дэлхий нийтээр хүлээн зөвшөөрөгдсөн жүжигчин, дуучин байсан бөгөөд амжилт бүтээлээр дүүрэн гялалзсан замналаа орхин амьдралаа амьтдын эрхийг хамгаалах үйлс болон өөрийн сангийнхаа төлөө зориулахаар шийдсэн” гэж Германы ntv телевиз мэдээлжээ. Жүжигчний нас барсан цаг хугацаа болон нөхцлийн тухай мэдээлэл өгөөгүй байна.

Сүүлийн үед Бардо олон нийтийн өмнө цөөн удаа гарах болж, ихэнх цагаа Францын өмнөд нутгийн Сен-Тропе хот дахь гэртээ өнгөрүүлж байжээ. Хэвлэлүүдэд мэдээлснээр, тэрбээр өнгөрсөн аравдугаар сард Тулон хотын нэгэн хувийн эмнэлэгт мэс засал хийлгэсэн байна.

Брижит Бардо (бүтэн нэр нь Брижит Анн-Мари Бардот) 1934 оны есдүгээр сарын 28-нд Парис хотод чинээлэг гэр бүлд төрсөн. 13 настайдаа тэрбээр Парисын Үндэсний хөгжим ба бүжгийн дээд консерваторт элсэн орж, Оросын бүжиг дэглээч Борис Князевын ангид суралцжээ.

Тэрбээр 1952 онд Бардо Жан Бойерын "Нормандын нүх" хэмээх инээдмийн кинонд гол дүрд тоглосноор кино ертөнцөд хөл тавьжээ. Улмаар 1956 онд нөхөр Рожер Вадимын найруулсан "Бурхан эмэгтэй хүнийг бүтээсэн" кинонд тоглосноор алдаршсан байна. “Бабетта дайнд явна” (1959), “Жигшил” (1963), “Газрын тос олборлогчид” (1971), “Дон Жуан эмэгтэй байсан бол” (1973) зэрэг 50 орчим кинонд тогложээ.

Брижит Бардо Европын кино урлагийн хамгийн дур булаам жүжигчдийн нэг, Америкийн Мэрилин Монротой эн зэрэгцэхүйц секс бэлгэдэл гэж нэрлэдэг байв. Түүний тоглосон сүүлчийн кино 1973 онд гарчээ. Энэ бол Нина Компанецийн найруулсан "Банзал татах дуртай Колиногийн сургамжтай, хөгжилтэй түүх" инээдмийн кино бөгөөд тэрбээр тус кинонд туслах дүрд тоглосон юм.

Эх сурвалж: DW