Японы нийслэл Токиогоос баруун хойд зүгт орших Гүнма мужийн хурдны зам дээр 67 авто машин мөргөлдсөн томоохон осол гарсны улмаас хоёр хүн амиа алдаж, 26 хүн бэртэж гэмтсэний тав нь хүнд гэмтсэн талаар цагдаагийн албаныхан мэдээлжээ.
Уг осол Минаками дахь Кан-эцү хурдны замын хотоос гарч буй чиглэлийн эгнээнд баасан гаргийн оройн 19:30 цагийн орчимд болсон бөгөөд цас орсны улмаас зам мөстсөн байсан тул авто машинууд хальтирсан байж болзошгүй гэж цагдаагийнхан мэдээлсэн байна. Ослын улмаас 20 авто машин шатаж, галыг унтраахад долоон цаг гаруй хугацаа зарцуулжээ.
Осол эхлээд хоёр ачааны машин мөргөлдсөнөөр эхэлж, улмаар машинууд ар араасаа мөргөлдөж ойролцоогоор 300 метр үргэлжилсэн осол гарсан байна.
Токио хотын оршин суугч 77 настай эмэгтэй ослын газарт нас барсан бол шатсан авто машины суудал дээрээс бас нэг цогцос олджээ.
Уг ослын улмаас таван хүн хүнд, 21 хүн хөнгөн бэртжээ. Баасан гаргийн 20:20 цаг хүртэл Минаками орчимд их хэмжээний цас орохыг Японы цаг уурын агентлагаас анхааруулсан байжээ. Тухайн үед жолооч нарт цас орж байгаатай холбогдуулан хурдаа цагт 50 км хүртэл бууруулахыг зөвлөсөн байна.
Эх сурвалж: Kyodo
