Дэлхийн хамгийн баян 25 гэр бүлийн хөрөнгө өнгөрсөн оныхтой харьцуулахад 358.7 тэрбум ам.доллароор нэмэгдэж 2.9 их наяд ам.долларт хүрчээ.

Тэдний хөрөнгийн хэмжээ өсөхөд хувьцааны үнэ нэмэгдсэн, металл болон гэрийн тэжээвэр амьтдын тэжээл зэрэг бараа бүтээгдэхүүний эрэлт өссөн нь нөлөөлснөөс гадна олон арван жилийн турш хуримтлуулсан туршлага нь чухал үүрэг гүйцэтгэсэн байна.

Хамгийн чинээлэг угсаа залгамжилсан гэр бүлүүд хэзээ ч өнөөгийнх шиг их хөрөнгөтэй байгаагүй бөгөөд энэ жагсаалтад багтах доод босго жилээс жилд 9.7 тэрбум ам.доллароор өсөж, 46.4 тэрбум ам.долларт хүрчээ. Энэ бол Өмнөд Америкийн хамгийн баянд тооцогдох боловч ердөө хоёр дахь үеийн бизнес эрхлэгчдээс бүрддэг Луксичийн гэр бүлийн хөрөнгийн хэмжээ юм. Энэ гэр бүлийнхэн зэс олборлолтын салбарт үйл ажиллагаа явуулдаг байна.

Жагсаалтын нэгдүгээр байрыг дахин Уолтоны гэр бүл эзэлсэн бөгөөд тэдний гурав дахь үе нь Walmart компанийг удирдаж байна. Тэдний бизнес нь хямд бараа зардаг жижиг дэлгүүрээс эхэлж, дэлхийн хамгийн том жижиглэн худалдааны сүлжээ болтлоо өргөжсөн юм. Энэ гэр бүлийнхний нийт хөрөнгө 513.4 тэрбум ам.долларт хүрчээ.

Жагсаалтын эхний тавд дараах гэр бүлүүд багтсан байна. Үүнд:

• Аль Нахайян, Арабын Нэгдсэн Эмирт Улсын эрх баригч гэр бүл (335.9 тэрбум ам.доллар),
• Аль Сауд, Саудын Арабын хаант улсын эрх баригч гэр бүл (213.6 тэрбум ам.доллар),
• Аль-Тани, Катарын эрх баригч гэр бүл  (199.5 тэрбум ам.доллар),
• Эрмес, Францын алдартай загварын ордныг үүсгэн байгуулсан, гар урчуудын удамтай гэр бүл (184.5 тэрбум ам.доллар).

Жагсаалтад мөн АНУ, Энэтхэг, Франц, Канад, Швейцар, Герман, Израил, Мексик, Итали, Бельги, Тайландын чинээлэг гэр бүлүүд багтжээ.

Эх сурвалж: Bloomberg