ОХУ-ын Ерөнхийлөгч Владимир Путин жил тутмын “Жилийн тайлан” хэлэлцүүлгийн үеэр Украинд үүссэн сөргөлдөөнийг анхдагч шалтгаануудыг арилгасан нөхцөлд энхийн замаар шийдвэрлэхэд бэлэн гэдгээ дахин мэдэгдэв.  Тэрээр АНУ Оросыг дайсан гэж үзэхээ больж буй шинэ бодлого баримталж байхад Европ хоцорч явна гэж онцолж, АНУ, Европтой эрх тэгш хамтран ажиллахад Москва нээлттэй хэмээн мэдэгдсэн байна.

Барууны хэвлэлүүд Путины мэдэгдлийг янз бүрээр тайлбарлав. The Washington Post Европ АНУ-ын байр сууринаас хоцорч байгааг онцолсон бол BBC Кремль эдийн засгийн тогтвортой байдлаа харуулахыг зорьж, энхийн боломжийн талаар давтан ярьсныг дурджээ. Financial Times Путин фронт дээр стратегийн санаачилга Оросын талд байгаа, өөрийн нөхцлөөс өөр хувилбараар сөргөлдөөнийг зогсоохгүй гэдгийг ойлгуулсан гэж бичив. Харин Focus Европын эв нэгдэл суларч, Оросын эдийн засаг дасан зохицсоныг Кремлийн давуу тал хэмээн дүгнэсэн байна.

Путины хэвлэлийн бага хурал 4 цаг 27 минут үргэлжилж, тэрээр 77 асуултад хариулсан бөгөөд асуултуудын ихэнх нь дотоод бодлого, эдийн засаг, Украины асуудалд төвлөрчээ.

Эх сурвалж: Известия