Луврын музейгээс үнэт эдлэлүүдийг хулгайлахдаа хулгайч нарын ашигласан тагтан дээр мягмар гарагт хамгаалалтын тор суурилуулжээ.

Дэлхийн хамгийн алдартай музейд 10 дугаар сарын 19-нд дөрвөн хүн нэвтэрч, ойролцоогоор 102 сая ам.долларын үнэт эдлэл хулгайлан зугтсан нь тус байгууламжийн аюулгүй байдлын цоорхойг илчилсэн юм. Хулгайч нар музейн гадна ачаа өргөгч байрлуулж, Аполло галерейн тагт руу үсрэн гарч цонхыг нь хагалаад, өнцөг бутлагчаар шилэн хоргыг хагалж, 7 минутын дараа скүүтерээр зугтсан байна.

“Луврын музей 10 дугаар сарын 19-нд болсон хулгайгаас сургамж авч, аюулгүй байдлаа бэхжүүлэх ажлуудыг үргэлжлүүлэн хийж байна” гэж тус музей X хуудсаараа дамжуулан мэдэгджээ. Түүнчлэн музейн алдарт шилэн пирамидын эргэн тойронд хөдөлгөөнт цагдаагийн ангийг байрлуулсан бөгөөд ирэх жил музейн эргэн тойронд 100 камер байршуулна гэж мэдэгдсэн байна.

Цагдаа нар хулгайн хэрэгтэй холбогдуулан найман сэжигтнийг тогтоосон боловч үнэт эдлэлүүд одоо хүртэл олдоогүй байгаа юм. Энэ хэрэг нь “Мона Лиза” зэрэг үнэлж баршгүй урлагийн бүтээлүүдийг хадгалдаг Луврын музейн аюулгүй байдлын талаар асуудлыг хөндөхөд хүргэжээ.

Луврын музейн ажилтнууд музейн гаднах хананууд дээр хамгаалалтын камер хангалтгүй байсныг, мөн тагт огт хамгаалалтгүй байсныг хүлээн зөвшөөрсөн юм. Энэ хулгай нь сүүлийн хэдэн долоо хоногт музейд тулгарсан хэд хэдэн асуудлын нэг байсан бөгөөд ус алдсаны улмаас Египетийн эд өлгийн хэсгийн номууд сүйдсэнээс гадна ажилтнууд ажил хаясны улмаас музейг хэдэн өдрийн турш хэсэгчлэн хаахад хүрсэн билээ.

Эх сурвалж: Reuters