Баянхонгор аймгийн Богд сумын нутагт өнөөдөр 16:42:16-д 4.5 магнитудын хүчтэй газар хөдлөлт бүртгэгдсэнийг ШУА-ийн Одон орон, геофизикийн хүрээлэнгээс мэдээллээ.
Тухайн газар нь Улаанбаатар хотоос 770 км, аймгийн төвөөс баруун урд зүгт 170 км-т оршдог. Газар зүйн байршил (өргөрөг, уртраг): 45.01 100.39 бөгөөд газар хөдлөлтийн төвөөс ойр орших сумд нь Баянхонгор аймгийн Баянговь сумын төвөөс хойд зүгт 30 км, Богд сумын төвөөс баруун урд зүгт 37 км, Жинст сумын төвөөс баруун урд зүгт 47 км юм.
Ташрамд, Монголд болсон газар хөдлөлтийн хамгийн томд тооцогдох газар хөдлөлт 1957.12.04-ний 11 цаг 38 минутад тус сум буюу Баянхонгор аймгийн Богд сум, Их богдын нуруунд бүртгэгдэж байжээ.
Газар хөдлөлтийн хүч 8-9 магнитуд /11-12 балл/ байсан бөгөөд одоо хүртэл газар хөдлөлтийн хагарал нь хэвээрээ төдийгүй тус ууланд газар хөдлөлтөөс үүссэн нуур ч байдаг. Энэ газар хөдлөлтөөс их, бага Богдын нурууд ба Бахар уулын ар, өвөр бэл, ёроолыг дагаж зүүн өмнөөс баруун хойш үргэлжилсэн ан цавууд үүсэж тогтсон байдаг бөгөөд уртаараа 130 км орчим газрыг хамарсан байдаг.
