“Туульсын хаан Жангар амилах аилах үдэш” үйл ажиллагааг энэ сарын 21-нд дөрөвдэх жилдээ амжилттай зохион байгуулав.
Монгол Улсын яаралтай хамгаалах шаардлагатай соёлын биет бус өвийн үндэсний бүртгэлд багтсан "Монгол Жангар хайлах" өвийг сэргээх, хадгалан, хамгаалах, өвлүүлэн үлдээх зорилгоор уран зохиолын оргил гэгдэх "Баатарлаг Жангар" туулийг хайлсан нь энэ юм.
Тэртээ 15 дугаар зууны үеэс өнөөг хүртэл өвлөгдөж ирсэн соёлын биет бус үнэт өвүүдийн нэг бол яах аргагүй Жангар тууль юм.
Жангар, Гэсэр судлаач, Ардын аман билэгзүйч Суръяа гуайн судалгаанаас үзэхэд, Говь-Алтай аймгийн Дэлгэр, Наран, Түмэн, Есөнбулаг сумаас Жангар туулийн дөрвөн эх гар бичмэл олдсон, Алтайн нурууны 13 ноён оргилын нэг Бурхан буудай уул тус туульд дурдагддаг гээд олон зүйлээр туультай холбогдож буй учраас үүнийг үр хойчдоо өвлүүлэн үлдээх ажлыг жил бүр өрнүүлж байгаа ажээ.
Жангар тууль хайлах үйл ажиллагааг анх 2022 онд Алтай хотноо 1000 хүүхэд Баатарлаг жангар туулийн 17 бүлгийг хайлж өв соёлоо түгээн дэлгэрүүлж байсан бол өдгөө дөрөвдэх жилдээ шинэчилсэн найруулга дэглэлтээр дахин 1000 туульч хүүхэд 17 бүлгийг хайлж өв соёлоо түгээлээ.
