Австралийн Засгийн газар иргэдийн эзэмшилд буй галт зэвсгийг буцаан худалдаж авах хөтөлбөр хэрэгжүүлэхээр төлөвлөж байгаа тухай тус улсын Ерөнхий сайд Энтони Альбанезе мэдэгдлээ.
Түүний хэлснээр, сүүлийн 30 жилд хэрэгжүүлж буй хамгийн том хэмжээний энэхүү хөтөлбөрийг галт зэвсгийн эргэлтийг зохицуулах тухай үндэсний хууль тогтоомжид нэмэлт, өөрчлөлт оруулсны дараа хэрэгжүүлж эхлэх ажээ.
“Засгийн газар уг хөтөлбөрийг бүс нутаг, мужуудтай хамтран 50:50 харьцаагаар санхүүжүүлэх бөгөөд галт зэвсгийг цуглуулах, иргэдэд төлбөр олгох бүх ажлыг бүс нутгууд шууд гүйцэтгэнэ” гэж тэрбээр мэдэгджээ. Цугларсан зэвсгийг устгах ажлыг Австралийн цагдаагийн газар гүйцэтгэнэ гэдгийг Э.Альбанезе мөн тодотгосон байна.
Үүнээс өмнө мужууд, нутаг дэвсгэрүүдийн засгийн газрын тэргүүн нар галт зэвсгийн эргэлтийг зохицуулах тухай хуулийг шинэчлэхээр төлөвлөж байгаа тухай мэдээлжээ. Үүний тулд бүс нутгийн эрх баригчдад галт зэвсгийн үндэсний бүртгэлийн газрыг яаралтай байгуулах, нэг хүн эзэмшиж болох галт зэвсгийн тоог хязгаарлах, зэвсэг эзэмшигчдэд хугацаагүй зөвшөөрөл олгохыг зогсоох, мөн зэвсэг эзэмших зөвшөөрөл авахад Австралийн иргэншилтэй байх шаардлагыг заавал тавих зэрэг ажлыг гүйцэтгэхийг үүрэг болгосон байна.
Эдгээр ажлыг Шинэ Өмнөд Уэльс мужийн Ерөнхий сайд Крис Миннс болон Баруун Австрали мужийн Ерөнхий сайд Рожер Кук нар гүйцэтгэх бол энэ үеэр Холбооны Улсын засгийн газар галт зэвсэг, түүний дотор 3D принтерээр хийсэн зэвсэг, тоног төхөөрөмж, сум хэрэгслийг импортлохтой холбоотой нэмэлт гаалийн хязгаарлалтууд нэвтрүүлж эхлэх юм.
Эх сурвалж: TASS
